Scharp Jannie Bruins

Scharp Jannie Bruins

Scharp

Robbert voetbalt in het eerste elftal in het dôrp en daor is e wies op. Zien club, zien dôrp, met die supporters die aal week an het veld staot of met heur met reist as ze oet moet speulen.
‘t Was al vro een talentvol voetballerie, zat jaoren op de jeugdopleiding bij een betaolde voetbalorganisatie. Toen het daor niet lukte, meldde e zuch an bij de plaotselijke voetbalclub. Die kunden zien komst slim waarderen.
Robbert is een sportman die op veul plaotsen speulen kan; dat is altied makkelk veur ‘n elftal. Hij kan een wedstried lezen en is scharp, héél scharp. Niks ontgeeit hum. Zien pap en mam reisden het hele laand met hum deur toen hij nog op de voetbalschool zat en ok nou volgt ze heur zeun op de voot. Nao een wedstried kreg e meestal een whatsappie van zien mam: ‘drei punten, goeie partij, mooie vrije schup.’

Robbert reageert aaid zowel bij winst as verlies: ‘slim bliede, almaol vôchten, twaalfde man top!’ Sinds e op zuchzôlf woont belt zien pap hum elke zundagaovend um saomen de wedstried te evalueren. Positie- en boetenspel, hookschuppen, veurzetten, doelpunten; alles wordt bespreuken. Voetbal veur en nao. of toch niet altied?
‘Is mam in de buurt? Och nee, huuft ok niet, zeg jij ‘t maor tegen heur. Volgens mij haar mam een neie winterjas an en die stun heur hartstikke mooi!’
Hij is scharp, arg scharp, zowel binnen as boeten het veld.

JANNY BRUINS

Hej ok een gedicht of kôrt verhaol daj hier wal lezen wilt? Of hol ie der van um te fotograferen? Stuur dan je foto, gedicht of allebei naor redactie@huusvandetaol.nl. Dan kan ‘t zomaor wezen datje inzending hier de volgende keer te zien is!