Schrievers-sters en heur wark Oeze Volk 36 jrg no 4 april '92

Schrievers-sters en heur wark Oeze Volk 36 jrg no 4 april ’92

SCHRIEVERS/STERS EN HEUR WARKmartha hadderingh

De lente was net as veurige jaor, weer veul te vrog. En umdat meert zien steert ruurt was het 27 meert meer winter dan veurjaor.
Maor der was zeker niet aans en daorum moej je der dan maor naor hebben. lk har die dag een aofspraok maokt met Janny Kok-Wolbers in Rune….dus weer of gien weer, ik stapte de bus in.

Rune
De Olde kerk miemert over de brink die in de loop van de jaoren aordig veraanderd is en waor e zuk arg zôrgen overmaokt.
Ja, dat kriej as de snijvlokken dwirrelt, dan begunt elk te miemern. De kerk wol de reurigheid van zaokenleven um zuk toehollen, zodat niet allent in de zummer ‘t volk bij hum komp buurten.
Maor dat e ok de reurigheid van de handel van vrogger in de winter weer met kan maoken.
Miemerend miste ok ik wat van het Rune van vrogger.
Dan stap ik bij Janny en Henk Kok de deur binnen. De koffie bruun en dat is bij zuk kold weer gloepens lekker.
Nao wat praoten over schrieverszaoken – het zakwoordenboekie was net uut – probeer ik Janny an de praot te kriegen over zuk zôlf. Wie nouw denkt dat Janny een begunnende schriefster is, slat de plaank mis.
Al veur ze trouwd was har ze veur de BOD jongeren al een eenakter schreven.
Dat kreeg laoter nog is een vervolg.
Janny weur geboren in Elp, hef daor heur schooljaoren deurbracht en kreeg met 1 1 aandere schoolkinder en ok groteren TB in 1949. Dat haj votdaolijk nao de oorlog, dat der ziekte in veul gezinnen veurkwam. Of dat nouw kwam deur de te eenziedige voeding of wat aans, dat weur niet dudelijk. Het was der en men mus der tegen vechten um der bovenuut te kommen.
Doe die beroerde tied van kuren achter de rug was gung ze hen Gronning waor ze 1 1 jaor as chefverkoopster in een winkel werkzaom was.
Dat ziekwezen, zeg Janny, hef maokt daj heel aans in het leven staot. En die uutspraok heur je heel vaok van mensken die arg ziek west hebt. Daor kwam dan ok nog bij, daj ruum 40 jaor leden beter niet over TB konden praoten, daor kun men ja niet met veuruut. Zoas nouw heel vaok met kanker. Jammer… want de luu die der met zit, hollen daor zeerte van over. Toch hef het maokt dat ik mensken die wat hebt, beter kan begriepen. En soms kuj dan een steun veur aandern wezen, zeg ze.
As ze Henk tegenkomp en hum het jawoord gef, komp der vanzôlf een tied dat der niet an schrieven dacht wordt. Ze hebt twee kinder kregen een meissie en een jonge, zoas der in ‘t nije Drents zegd wordt. In 1957 begunt ze weer te schrieven, dôt met an een wedstrijd veur gedichten schrieven en wint daor ok priezen met.
Geesje Been en Hitjo Schut, met nog wat aandere mensken hebt heur stimuleerd. En het was nao een uutzending van Hitjo, met een verpleegster, waorin die vrouw zee, dat ze Olde mensken niet begreep deur het gebruuk van het Drents, dat Janny Kok besleut um taolverklaorings van het Drents naor het Nederlands te gaon schrieven. Dat wark is deur de jaoren hen publiceerd in de Hoogeveense kraant. Niet allent die woordverklaorings maor ok verhaolen en gedichten.
En ij begriept wel, ze is ok metwarkster van Oeze Volk.
Die woordverklaorings wil ze nog wel geern is in een boekwark uut laoten geven umdat daormet het Drents as taol bewaord kan blieven en het ok een anwinst kan wezen veur mensken die deur heur wark veul met Drentse mensken in anraoking komt.
Vanaof de start van Radio Drenthe hef Janny op de zaoterdagmôrgen een rubriek had. Een rubriek waor veul naor lusterd weur, want der kwamen nogal wat reakties op.
Dat is now aoflopen, der kwam weer wat nijs veur in de plaots.
Dit was dan in vogelvlucht een beeld van Janny Kok, die op de foto gezellig an de heerd zit.