In het weekend van 15 tot 17 september was der in Valthermond het festival “Voel het Veen”. Bert Hadders hef gasten an taofel ontvangen, Edwin Jongedijk zung liedties en Herman Sandman wus het niet, maor zee het toch.
Dichter en schriever Egbert Hovenkamp II schreef een TerPlekkePoeem tiedens dit festival, dat daor ok oetspreuken is.
BERICHT OET ‘T VEEN
…Jan Veen löp met zien dweellocht in de haand deur…uh…’t veen
(hij komp van ‘t zaand)
nao wat strunen
zöt e locht
geeit der hen >
een hoop volk is der op batterij
der steeit een praottaofel
met volk daoran
eein daorvan stukt oet
hoou of ‘t veen ervaoren wodt
en hoou of der leefd wodt;
de zaanger zingt
de zun schient
zien akkoorden op boeten
de muren um oous hen
‘t leven is met oous
de zaanger zingt
de waorheid naor oous toou
krek as in een relaotie
tweei kaanten in en oet aodemt
tweei kaanten underdak bint
tweei kaanten um mekaor hen daanst
tweei kaanten met mekaor sjaanst
de tied gledt van toen naor nou
wat der was…wat der opdeuken is >
waoter deur een kaole vlakte, aaindeloos
veen was de undergrond veur wat gruide
waor pecunia bluide
overaal kwamen ze vort en maor graoven
roeg volk, zoas dat het, staopelde ‘t törf
der was niet allent armooude
binj gek!;
der was volk dat l e e f d e
dat haandelde dat haanden oet de mouwen
jaor in jaor oet seizoenen
elk haar zien eigen “bubbel”
waorin waarkverwaanten
graoven en maor graoven
eerappels krabben graoven met vörk en haanden
nei leven
kerk en schooul oet de grond stampt
febrieken lokten volk naor zuch toou
sociaole ‘bubbels” knapten oet mekaor
bussen reden of en an
winkels deden de deuren dicht
volk gung met auto op pad
naor wieder en gooudkoper vort
(middenstaanders stickerden zuch loos hen de mensen)
de taol sprek zuch oet
naomen draogt van waor
naomen zèegt waj an maans hebt
en het törf stun te dreugen
de zaanger zingt zien leeid
umaarmt oous met wat oet zien leven;
pien underwegens klappen kriegen de duvel de Leeive Heer krassen op de ziel vrouwlu die as daanst
umaarmd deur klaanken oet haart en ziel –
een leeid-verhaol
verhoezen van ‘t veen naor argens aans
en maor schrieven over wat je angeeit
kieken naor de mèensen
waor aj haot en leeifde bij veuilt
wat ‘t is…….ik zul ‘t niet weeiten
de pen gledt over ‘t pepier en woorden staot op
wat was is wèest
wat komp is der nog niet
wat hier vort komp hef heuil wat in de beein braacht
op pad gungen ze
in hoes bleven ze
de boeren zeuikt touw
de affiches zèegt NEE
hij kek naor de mèensen vrag zuch of wet ‘t niet
op pad dan maor
naor waor dan ok
pen over ‘t pepier laoten glieren
woorden op laoten staon
en wieder: ik zul ‘t niet weeiten
naor ‘t teniel dan maor
de plaanken op schrieven eerst putten oet de grond vrouwen an ‘t woord wat ze overkwaam kieken in het hoes herinnerings duukt op deuzen gaot open zeuiken in een hoes naor verhaolen de plaanken op plukken oet de locht waor as ze umheer daanst nou hier op de plaanken historie vanneis op aodem
~~~
de zaanger en zien zwienen
het zaand en het veen
de taol het zoepen het breken van haarten het herinnern van kameraoden het stiekum smoken het drinken en het roken
as Drent binj altied stoned omdaj tussen hunebedden woont
(dat scheelt in de kosten)
het herinnern van een kameraod
het pad dat as e gung
het ankieken het naokieken
het weeiten van zien golden haart
waor as e zölf gien weeit van haar
…de boom stun in de weg…
herinnerings bint bleven…
een neie tied komp op batterij
taol gledt van de tong vort aandert zuch
underwiel bakt en knipt ze
en bepaolt de pries (nao ofspraok)
op pad gaon in ‘t leven
weerum kommen niet vort gaon dooun laoten laoten weden op fietse op feesten an keet maoken zoepkeet
de leeftied brèengt van ales met zuch met
as je haor maor gooud zit
as ‘t kind maor welkom is
ik het peerd bin
dat de daans maor lössies is
dat het haart klopt
dat der leven is
het opgruien geeit zo haard
ik zeei het veurbijgaon
ik kiek naor het haandtie um mien vinger hen
weeit daj welkom bint de heuile tied
de aandere tied:
‘t café met veul biezunders
piraoten zungen zuch oet de jukebox
de geheime zenders knalden oet de ether
de middengolf
op fietse verzeuiknummers veurbereiden
DE GALM DE GALM DE GALM DE GALM
wiezer met de tied
tied met wiezers
wiezen dat de studio een kaomer veur ‘t poppie mus wodden
(de plietsie regelde dat)
gien volgende keer meer
op ‘t café an
kieken of ‘t lös is
zin in een zeupie
op doen an –
bruloften en partijen biljarten roken in een roeme ruumte baankzaoken waden ok regeld wat aal niet
kassa under de aarm
romantiek met munten en biljetten en ach > de tied tèelt zuch oet
“schrief maor op” > de tied tèelt zuch oet
de tied klinkt zuch weerum
rock ‘n’ roll dreunt zuch
naor heufd en haart
naomen laot herinnerings opduken
laot maor kommen
laot maor gebeuren
leven klönk in de meziek en vun plaots
‘t kun minder ‘t kun net
‘t was uniek der was pebliek
de umzet kun der met deur
het interieur vreuig um een beurt
lös van dat: het is gebeurd
der is van heurd
het was hier
het was waor
elk en eein was der bij: ik ok en ij en jij
net as dizze aomd:
Jan Veen löp met zien dweellocht hen boeten, döt herinnerings in de buus
geeit
op
‘t
zaand
an
© Egbert Hovenkamp II