Zaoterdag hew een fantastische aovend had op het Openluchtmuseum in Skonnerd.

Het was de eerste maol daw zukswat orgeniseerden en wij hadden gien veurstelling van wat te verwachten.

Um haalf zeuven stund der een rij volk vanof de poort tot an de straot en een haalf uurtie laoter waren der meer dan 300 man binnen. (Wij hadden nog niet op de helft rekend.) Mèensen wat een volk. Wat een overweldigende belangstelling.

Improviseren dus.

Binnen een kwarteer waren wij gangs en kun het volk genieten van de veurlezers, zuk vergapen an de Witte Wieven, hungen ze an de lippen van de schooljuffrouw en de domnee, waren der allerlei suggesties bij het raoden van veurwarpen en wuur der andachtig luusterd naor het kinderkoor. En zo hier en daor luup je Ellert en Brammert tegen het lief.

An het eind was der veur iederien een kop koffie, thee of sukkelaodemelk, under de vrolijke klanken van het trio Bruinsma.

Nao ofloop waren der veul lovende woorden en gaf het volk an dat ze zuch prima vermaakt hadden.

Wij kunt terugzien opeen hiel geslaagde aovend die zeker veur herhaoling vatbaor is.

Foto’s: Jaap Aalderink, Henk van Tellingen en aandern.