De eerste zichtbare stappies richting De Vlinderprinses: audities veur acteurs en zangers

Achter de scharmen is der al hiel wat gebeurd vanzölf, maor zaoterdagmiddag 6 mei kwamen de eerste acteurs en zangers die geern metdoen wilt an De Vlinderprinses naor MFC De Brink in Slien um auditie te doen. Een spannende middag veur veul van heur. Van de 175 mèensen die zuch de ofgelopen tied anmeld hebt, waren der roem dartig neugd um veur te zingen bij artistiek leiders Jan Kruimink en Harm Dijkstra. Lu die zuch opgeven hadden veur een tenielrol mussen daornaost een stukkie oet een scène speulen.

Umdat iederien die metan döt op ienig moment metzingt met het grote koor dat der – net as bij De Toorn van Thunaer – weer komp, was veurzingen veur alle dielnimmers een must. Bij de audities weur under andere keken naor de kwaliteit en het bereik van heur stemmen en in welke stemgroep ze thuusheurt (bas, tenor, alt, sopraan of mezzosopraan). Dat gebeurde an de haand van zölf oetkeuzen nummers en de kinderliedties Berend Botje en Daar wordt aan de deur geklopt.

Daornaost bint der meer as twintig tenielrollen te verdielen, grote en kleinere. Dielnimmers an dizze audities kregen zeuven stukken tekst oet scènes toestuurd. Daorvan mussen ze een tekst oetkiezen die heur het miest ansprak, zuch inleven in de rol en dat stuk speulen. Tiedens de auditie letten Harm en Jan veural op verstaonbaarheid, oetstraling en expressie.

Maor het was zaoterdag niet allent spannend; het was veural gezellig en de dielnimmers en de organisatie hadden een hoop lol met mekaor.

Der volgt nog meer auditierondes de kommende periode. Nao de zommervekaansie wordt de rolverdieling bekendmaakt.

Bekiek hier de foto’s van Henk Siepel: