Frans Westenbrink oet de tied kommen
Op 27 juli lestleden is Frans Westenbrink oet de tied kommen.
Westenbrink vun schrieven altied een schiere bezigheid. Hij har een toerlang een maondelijkse column bij RTV Drenthe en aj in het Openluchtmuseum op Skonnerd bint heur ie daor zien versie van het verhaal van Ellert en Brammert, wat daor deur vrijwilligers verteld wordt.
Frans Westenbrink woonde deur zien wark u.a. in Leeuwarden, Borculo en Emmen. In de tied dat e Eindhoven woonde begund’e serieus met het maken van Drentstaolige liedties. Veul artiesten bint liedties van hum zingen gaon. Hij meuk ok rippertoire veur koren en zörgde u.a. veur de cd Girrelzaand. Hij warkte ok met an het boek Drentse Portretten, verhalen van buitengewone Drenten.
In zien vrije tied gung Westenbrink as vervangend schaopherder van de kudde Drentse Heideschaopen in Rune de hei op. Later richtt’e de Nederlandse Fokkersvereninging Het Drentse Heideschaap op. Daorvan was e erelid. Zien verbundenheid met Rune sprek oet een tekst van eigen haand boven de advertentie:
A’k toch mu starven
En ’t is misschien wat gekke proot
Mar ‘k gao ’t liefst ien Rune dood!
Wij wèenst zien femilie en aandere naosten veul starkte.