Jan Veenstra is oet de tied kommen

Schriever Jan Veenstra is oflopen nacht oet de tied kommen. Daormet verlös de Drentse culturele wereld een literaire doezendpoot. Jan Veenstra oet Linde was schriever van verhaolen, columns, liedteksten en tenielstukken. Dat dee e in het Nederlands en in het Drents.  Boetendes was e anfieteraar van verscheiden culturele projecten. De Taaltheaternacht, de Hunebed Turbo Show, Taanden van de Tied, De Zeuvendaagse, Babyboomers Blues, Mina Koes, ZomerGoed en Spitwerk in Suthwalda bint der een paar van. 

Jan Veenstra debuteerde met verhalen in Oeze Volk. Vanof 1982 leverd’e bijdragen an Drents letterkundig tiedschrift Roet waorvan e tussen 1984 en 1998 redactielid was. Zien wark stiet in verscheiden bloemlezings. In 1989 kwam de debuutnovelle Zangeres van zulver oet. In 1997 wun e de SNS-literatuurpries. Een jaor later kwam der een bundel verhalen oet met de titel Die nacht een feest. In juni 2004 kwam Veenstra met de eerste Drentstaolige speurdersroman: Tammo Tiesing en het liek op zolder.  In de jaoren daornao warkte Jan met an verscheiden projecten van het Huus van de Taol, zoas de Drentse boekenweek, de Vuelta en het bezuuk van Willem-Alexander en Maxima an Drenthe.

Samen met zien vrouw Marga Kool was e jaorenlang columnist veur het Dagblad van het Noorden. Ok was het duo jaorenlang de leverancier van de tenielteksten veur Vrouwenteniel Erica. Jan was in zien warkende leven heufd communicatie bij Essent. Nao zien pensionering is hij met Marga in 2021 de Theaterschuur in Linde begund. Heur doel: een kleinschaolig en toegankelijk podium veur de beleving van cultuur en landschap in Linde bieden. Op 13 september kreeg hij de gemientelijke erepenning van de gemiente De Wolden.

Jan Veenstra is 74 worden. We wenst de femilie starkte.