In heur woonplaots Nijmegen is schriefster Marga Zwiggelaar op 25 febrewaori 2026 oet de tied kommen.

Zwiggelaar gruide op in Hoogeveen en vertrök in 1980 hen Kampen um daor te studeren an de Sociale Academie. Ze warkte jaorenlang as opbouw- en jongernwarker in Hoogeveen en undertussen studeerde ze Algemiene Cultuurwetenschappen. Ze rondde die studie of in 1999. Van 2001 tot 2011 was ze an het wark in de museumwereld; zo was ze u.a. conservator van het Museum de 5000 morgen.

As Annije Maria Brans schreef Marga Zwiggelaar geregeld in cultuur-historische tiedschriften, benaom over Drentse underwarpen. Ze hef een eigen cultureel en historisch adviesbureau had en was ien van de oprichters van de levende geschiedenisgroep Die Luyden van ’t Hooge Veine.

Op 56-jaorige leeftied meuk Zwiggelaar heur dreum waor en weur ze zuster bij de Congregatie van Zusters Dominicanessen van Neerbosch in Nijmegen.

As Annije Maria Brans publiceerde Marga Zwiggelaar in 2007 veur het eerst heur Drentstaolige gedichten in een boek: Begraafplaatsen in de gemeente Hoogeveen.
In 2010 dee ze met an de schriefwedstried van het Huus van de Taol. Der verschient regelmaotig gedichten van heur in het blad Roet.

Heur poëzie-debuutbundel Niks is zo hiete as old ies kwam oet in 2015 bij Het Drentse Boek. Op 7 december 2019 kwam Marga heur eerste proza-bundel oet. Dat was de historische misdaodroman Maagie in het ies, die zuch ofspeult in het Hoogeveen van 1785. Veur dizze roman kreeg Marga Zwiggelaar de streektaolpries van het Dagblad van het Noorden.

Marga Zwiggelaar is 62 worden. Wij wèenst heur naosten starkte.