Neie bundel ‘Mijn voeten op de oude grond’ prissenteerd

In een volle raodszaal in Roden was op vrijdag 23 oktober de boekprissentatie van ‘Mijn voeten op de oude grond’. Het leek wel of alle schrievers van de gemiente Noordenveld zuch in het gemientehuus verzameld hadden. In een gezellige sfeer leidde oetgever Bert Rossing van Het Drentse Boek de geneudigden deur het program. Streektaolambassadeur van het Huus van de Taol en schriefster Tea Nijnuis oet Paais legde oet hoe het idee veur het boek ontstaon was nao bekendmaking dat Noordenveld de Culturele gemiente van Drenthe in 2026 worden zul. Daornao vertelde schriever Henk Nijkeuter wat e tegenkommen was tiedens het schrieven van ‘Mijn voeten op de oude grond’.

In het prissenteerde boek staot schrievers die een link met de gemiente Noordenveld hebt, van de 19e ieuw tot vandaag de dag. Gedichten, verhalen, dagboeken en dörpskronieken wisselt mekaar of. De bundel is meertaolig. Naost het Nederlaands en Engels hef ok de streektaol een stee kregen.

Tiedens de prissentatie lazen drie schrievers oet eigen wark veur. As eerste sprak Jaap Ekhart over de briefwisseling tussen een stellegie in oorlogstied, Harry de Metz en Janny Hulleman. De metz is as Jeudse man beland in warkkamp De Fledders bij Nörg. As tweide schriever las Tea Nijnuis heur Drentstaolige gedicht over de Paaizer karktoren veur. As lèeste sprak de jonge schriever Dylan Sappema zien Engelstaolig gedicht ‘Glitter is a gun’ oet.

Op de umslag van de bundel ‘Mijn voeten op de oude grond’ stiet een ofbielding van een schilderij van schilder en schriever John B. Vorenkamp oet Paais. Tegen het èend van de boekprissentatie weur het eerste exemplaar van het boek an burgemister Klaas Smid geven. 

Het boek is veur € 25,- te koop bij boekhandel Daan Nijman in Roden en bij het Huus van de Taol in Beilen. Ok is de bundel te bestellen op de webshop huusvandetaol.nl.