Op 15 april is de zeuvende oflevering van de neie serie Praot Drents Met Mij online kommen.
‘Je waren gewoon netties op oezölf, mar niet dat mien moe nou altied met de krulborstel in de haand stund ofzo’. Toch har Eefje Snijder oet Neilaande maor ien dreum: kapper worden. Veur de opleiding mus ze veer dagen in de week warken en ien dag naor schoel. En daor gung het nog zowat mis umdat ze gien warkplek vinden kun en zuch al inschreven har veur facilitaire dienstverliening. Op het leste moment kwam het toch nog goed.
Eigen salon
Snijder was op heur 19e klaor met schoel en warkte toen in een salon op De Krim. Op heur 20e stopten de eigenaren van die salon dermet en kwam de vraog of ze het overnimmen wol. En dat dee ze: ‘De beste leer is natuurlijk um of en toe een keer goed op de snufferd te gaon’.
Haorwarkspecialist
In de kapsalon kreeg Snijder aal vaker van doen met mèensen die roos hadden of hiel vet haor. En um daor een betere oplössing veur te vinden dat allent een flessie shampoo te verkopen, verdiepte ze zuch in wat daor an te doen was. Van het ien kwam het aander: ‘Ie hebt dan bijveurbeeld iene met problemen op de hoofdhuid, die wordt vaak ok kaal’. Dus mus der keken worden naor een haorwark. En naor een specialistische opleiding, zodat klaanten het haorwark ok declareren kunden bij de zörgverzekering.
‘Ik wil absoluut niet hebben dat meinsen zuch kwetsbaar vuult’
Snijder döt er alles an um mèensen een goed gevuul te geven, want de impact van haorproblemen is enorm. Zo hef ze veur het haorwark een aparte ruumte, zodat klaanten in alle vrijheid het verhaal kwiet kunt: ‘Het is niet iets um oe veur te schamen, het overkomp oe’.
‘Ik word in hiele körte tied snel eigen met de klant’
Snijder markt in gesprekken dat de streektaol helpt um dichter bij heur klaanten te kommen.
Berner Senners
‘Wij bint echt Berner Senner-liefhebbers, dit is oonze vierde al’. En met de hond loopt ze geern een rondtie bij ’t Visgat.