Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.

Muzikaant Gunhar Koops is geboren en getogen in een muzikaal gezin op Valthermond. Zien olde lu hadden daor een kapperszaak. Koops was een drok jonkie: ‘Ik zag alles om mie hen vlaigen, maor wat belangriek was, zag ik nait.’

Bermuda
In zien jongere jaoren was Koops elke zaoterdagaovend in Bermuda te vinden: ‘As ik dat nait had har, dan klopte der iets nait’.

Zölfstandig undernimmer
Naodat e zien eerste stappen in de horeca maakt har bij de Schuttershof in Exel, sleug Koops nao tien jaor zien eigen pad in en gung deur as zölfstandig undernimmer in de horeca. Dat hef e met veul plezier daon, maor in 2025 komp e tot de conclusie dat het tied is um zien dreum nao te jagen: volledig de meziek in. En daor giet e dan nou ok vol veur.

Liedties schrieven
Koops huuft humzölf niet op te sluten um tot goeie liedteksten te kommen; de mieste nummers hef e binnen tien minuten in grote lienen op pepier staon. Ok hef e liedteksten weervunden die e dartig jaor leden schreven hef. Daor wil e nou eerst wat met doen.

Valentijn in ’t veen
De liefde tussen Koops en zien Nelleke ontstund toen ze samen in de organisatie van Valentijn in ’t veen stapten. Intussen organiseert ze dat alweer een jaor of wat en treedt ze ok geregeld samen op. Valentijn in ’t veen klinkt volgens Koops misschien wal romantischer as dat het is: ‘Wij viert de laifde veur meziek, we gaot van rap naor rock naor alles.’

Dreuge worst
Koops kan zuch een leven zunder dreuge worst niet veurstellen. Dat is veur hum gewoon thuuskommen: ‘As ik op vakantie gao, heb ik altied een paar dreuge worsten bie mie.’

Dizze oflevering is vanof nou te belustern op alle bekende streamingdiensten zoas Spotify en iTunes, maor ok op de websites van RTV Drenthe en het Huus van de Taol.