Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.

Burgemister van Midden-Drenthe Jan Zwiers was vrogger, zoas zien oma zee ‘een klein haandtie vol’. Op de middelbare schoel keus e veur een feestpakket: ‘Uuteindelijk kun ik nargens aans hen as naor de tweede klas van de MEAO’.

Samenwonen
‘Wij wolden niet in hetzölfde dörp gaon samenwonen as waor mien va en moe en mien schoonolders woonden’. Dus gung Zwiers met zien Jeannet in Emmerholt wonen. Maor nao tweeënhalf jaor hadden ze wal bekeken dat dat niet heur stee was en dat ze geern weer naor een dörp wolden.

Bananenrieptechniek
Nao een toertie as accountant warkt te hebben, mak Zwiers de overstap en wordt commercieel directeur bij Koelgroep Dorenbos in Tynaorl. Daor was e drok met de verkoop van bananenrieptechniek:  ‘Een banaan  komp hier natuurlijk gruun an en die wordt niet vanzölf geel. En daor hej technieken veur’. Hie reisde hiel Europa deur um dizze techniek an de man te brengen.

Politiek
Dat Zwiers de politiek inrold is, har e zölf vrogger ok niet dacht: ‘Ik was echt volledig politiek bewusteloos zeg ik altied’. Toch bint hum op een gegeven moment de ogen lös gaon veur wat er in de samenleving gebeurt. En nao de oprichting van BBC2014 rold’e redelijk rap de politiek in. De partij weur de grootste nao de gemienteraodsverkiezingen van 2014 en Zwiers gung an de slag as wetholder: ‘Aj A zegt, moej ok B zeggen’ en dus zee Zwiers zien baan bij Lefier op. Al har e gien idee wat een wetholder döt en was zien leercurve aordig steil in het begun.

Bedreigings
Zwiers is niet al te benauwd anlegd: ‘Over het algemien ben ik wal zo, as het moeilijk wordt, moej een stap veuruut doen, niet achteruut’. En dus wordt in Midden-Drenthe mèensen gewoon oetneudigd as ze op social media wat roepen hebt over de gemiente, ambtenaren of B&W. Al bint er vanzölf ok situaties waoraj soms plietsie of bescharming bij neudig bint. En zien hoes is ok beveiligd, sinds e burgemister is.

Dizze oflevering is vanof nou te belustern op alle bekende streamingdiensten zoas Spotify en iTunes, maor ok op de websites van RTV Drenthe en het Huus van de Taol.