Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.

Zangeres Lara Boode gruide op in een muzikaal gezin in Pesse: ‘Toen ik acht was, was ik al hielemaol fan van Roy Orbison.’ As klein wichie was ze gek op boeten speulen, daansen en zingen. Boode wus al jong dat ze vort wol oet Pesse, want in het noorden was in die tied het anbod veur zang en daans nog niet hiel groot.

Musicalopleiding
Boode kwam op de musicalopleiding in Zoetermeer, maor die hef ze niet ofmaakt: ‘Het gung meer um wie aj kenden, dan wat aj deden.’ Het meuk niet zoveul oet oj het daor goed deden, aj maor aordig deden tegen de juuste mèensen. En dat paste heur niet.

Docentenopleiding
Boode besleut docent te worden, de opleiding dee ze in Grunningen. Ze hef daornao nog verscheiden aandere opleidingen volgd en stiet nou veur de klas as docent Nederlaands: ‘Hiel veul meinsen ziet het as een lös vak, mar ja, alles wat aj doet, dat doej in die taal’. Boode gef zowal NT1 as NT2. Bij NT2 (Nederlaands as tweede taol) hef ze wal markt dat ze dat op een aandere menier brengen möt: ‘Daor kuj bijveurbeeld niet in de verleden tied praoten.’

Meziek
Boode is altied blieven zingen en stiet geregeld op het podium. Heur liedties bedèenkt ze meesttieds op fietse: ‘Dat doe’k dan in mien heufd, zeg mar. Soms dan stop ik even, en dan deink ik oeh, dit moe’k even inzingen! Want aans dan bin’k thuus en dan deink ik oeh, wat was ’t nou ok alweer?’

Optreden in Engelaand
Met heur gitarist Gijs is ze tweimaol in Engelaand west um op te treden: ‘Die meinsen hebt een hiele aandere cultuur ten opzichte van muziek. Die gaot allemaole naor de pub en die gaot zitten en luustern’. Dat is wal een verschil met Nederlaand, waor ze eigenlijk nooit optredens in cafés döt, umdat elkenien daor deur heur nummers hen zit te praoten.