Op 22 april is de achtste oflevering van het neie seizoen Praot Drents Met Mij online kommen.

Wetholder Rieja Raven hef het Drents nooit actief metkregen van heur olde lu. Ter veurbereiding op dizze podcast at ze de aovend erveur nog maor even een stukkie dreuge worst.

‘Vanuut oes huus koj de tillevisietoren van Smilde zien’
Raven gruide op net boeten Beilen as kind van een va oet Spier en een moe oet Beilen. Heur olde lu preuten wal Drents met mekaar, maor niet met de kinder. Toen ze een jaor of dartien was gung ze in de lelies warken en daor was het raar aj gien Drents preuten, dus daor mus ze wal.

‘As ik wat in de kop heb, he’k het niet in de kont’
Raven umschref zuchzölf as eigenwies, al van kindsof an. Toen ze ooit fietsen leren mus, dacht dat ze dat gewoon wal even zomaor kun. Dat bleek niet zo te weden, dus dat weur een hiel drama.

‘Ik wol hier in het noorden blieven’
Raven studeerde in Grönningen. Dat was veur heur ok de ienige keus, umdat ze hier niet vort wol. Ze was in die tied ok nog hiel drok met de peerden, dus op kamers wonen was der niet bij.
Raven zat niet stil; ze studeerde geschiedenis én Duuts. En toen ze klaor was dee ze der ok nog een studie landschapsgeschiedenis achteran.

Politiek
Raven rolde min of meer per ongeluk de gemienteraod in en sindsdien zit het, zoas ze zölf zeg, ‘in heur bloed’. Ze vindt het belangriek um wat te doen veur de samenleving en um der veur te zörgen dat mèensen het beter kriegt. Ze hef niet de ambitie um dat op landelijk niveau te doen, want heur hart lig hier.

‘Hoge bomen vangen veul wind’
Het wark as wetholder gef Raven altied wal een bepaalde druk. Ok vindt ze de menier waorop mèensen met mekaar umgaot niet altied hiel plezierig. Het wordt soms wal slim op de persoon speuld en dat is volgens heur niet neudig.

Privé
Raven is trouwd met veurmaolig burgemister van Coevern Bert Bouwmeester. In hoes wordt er dus veul over politiek praot. Maor soms is er ok tied um samen meziek te maken, want Raven speult klarinet en Bouwmeester bügel.