Het Huus van de Taol hef in samenwarking met RTV Drenthe een zeuvende seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.

Kapper Robert Braam gruide op in Hesseln met zien mamme en zien oldere breur. Hie was een vrij en vrolijk jonkie: ‘Ik luup overal hen binnen waoras van ik dacht daor vin ‘k het wal gezellig.’

Nao de legere schoel gung Braam naor de middelbare schoel in Hesseln. Hie har misschien wal naor Emmen kund, maor: ‘Mien moeder vund mij nog zo’n klein ielig mannegie. Ik was nog gien ien meter vieftig toen ‘k naor de middelbare schoel gung, hiel mager.’

Tenielschoel
Braam dee nao de middelbare schoel auditie veur de theaterschoel in Arnhem, maor met zien vieftien jaor vunden ze hum daor nog te jong en te weinig levenservaring hebben: ‘Wat belachelijk was natuurlijk, want as der ien levenservaring har, dan was ik dat wal.’ Achterof bekeken is e bliede dat e de theaterwereld niet ingaon is, want het is veur hum een veul te onzeker bestaon. Toch döt e vandaag de dag nog hiel veul met theater: zölf speulen, regisseren, pruken maken. En daor kan e zien ei hiel goed in kwiet.

Kapper
Met de opkomst van het internet veraanderde der een bult veur kappers. Mèensen kwamen zölf met plaoties hoe het haor zitten mus en as Braam het dan aans dee, dan dee e het niet goed: ‘Ik bin nog steeds de vakman, ik heb der veur hen schoel west, ik heb der ervaring in opdaon.’  Daorum hef e ok acht jaor boeten de kappersbranche an het wark west.

Hartklachten
Veurig jaor kreeg Braam onverwacht een hartanval. Dat was schrikken, maor hie zette de knop al in de ambulance hiel rap weer um: ‘Ik bin hier bij de ambulance, die brengt mij naor de plek waoras ik weden moet um weer beter te worden en het is heur reputatie te nao um mij dood te laoten gaon’.  Alles giet nou weer goed, maor hij kan nog altied minder goed tegen geneuzel en is emotioneler, waordeur e niet meer met dreuge ogen naor de veurankondiging van ‘All you need is love’ kieken kan.