Schriever Ton Peters is oet de tied kommen

In zien woonplaots De Haspel in ’t Westerkwartier is schriever Ton Peters vrijdag 9 oktober oet de tied kommen. Hij is 74 jaor worden. Ton was tot an zien dood redactielid van oes literair tiedschrift Roet.

Ton weur geboren in Dieren in Gelderland. In 1983 kwam e naor Drenthe. Op verscheiden schoelen gaf e les as leraar geschiedenis, Nederlands en wiskunde. Ton Peters was daornaost schriever. Hij publiceerde een stuk of wat oetgaven in een kleine oplage, zoas Lessen in gespletenheid, Paradijs van aktentassen en Repnik. Ok schreef e Het grote Torenboek, over de restauratie van een middeleeuwse toren. Vanaof de jaoren ’90 zat e bij het schrieverscollectief van stichting OpMars in Assen. Ton meuk veural songteksten veur dit cabaretgezelschap. Met de Noord-Drèentse schriever Peter van der Velde hef Ton veur Roet light-versegedichten schreven waorbij beide dichters op mekaars wark reageerden.

Ton Peters hef de Drèentse taol van zien buurman in Elp leerd. In 2009 schreef Ton samen met Jan Veenstra het Drèentse boekenweekkedo Dörpstraot oes dörp. Jan Veenstra schreef veur dit geschenk körte prozateksten, Ton Peters de Drèentse gedichten. Samen met Gezienus Omvlee, Rob Boudestein en Ben Hoogland vörmde hij het dichtersgezelschap De Loftrompet, dat laoter het Drents Light Verse Collectief weur. In 2012 kwam van heur de Nederlandstaolige gedichtenbundel De dood en het peleton oet met 44 wielergedichten over wielrenners die op een vrömde menier oet de tied kommen bint. In 2014 schreven ze de bundel Drenthe is best mooi (op Google Maps), in 2018 volgd deur de bundel Binnenkort Uitverkocht. In 2019 bracht Ton Peters het boek De maon hef nacht under de naogels oet, waorin e gedichten van de Amerikaanse dichter Ted Kooser umzet hef naor het Drèents.

Ton was een met-organisator en anfieteraar van taolrelateerde initiatieven. Zo har e een radioprogramma waor e de luusteraars het light verse-dichten leerde en zat e in de jury van het Nederlands Kampioenschap Light Verse-dichten. Ok was e met-organisator van de zeuvendaogse literaire wandeltocht en kwam der deur Ton de jaorlijkse Driekdag in Grunnen.

Ton Peters was een bescheiden kerel met passie veur de (streek-)taol. Zien enthousiasme en vakmanschap zult mist worden. Wij wèenst zien vrouw Trees en de kinder starkte.