Vief lekkerste Drentse woorden bekend, stemweek begunt

 

In december biw altied drok met de zuuktocht naor het lekkerste Drentse woord. Nao een week woorden insturen is het nou tied um te stemmen op ien van de vief vaakst ingezunden woorden! 

Tot 10 december kun elkenien een woord insturen. Dat gebeurde zu’n 300 maol, met een prachtig gevarieerd risseltaot. Het lekkerste woord brengt weer hiel aandere woorden op batterij. Naost woorden as sausemangels, zeupie en sukersunterklaosien, allemaol woorden die met eten van doen hebt,  waren der ok goenend die keuzen veur lekker klinkende woorden as kleistern, sneiballegie en snipsnaorderijen.

Het gung dus veul um eten van ‘t jaor, dat is ok te zien an de top vief. In willekeurige volgorde bint dit de vief vaakst genuumde woorden:

 

Gloepends – wordt veural gebruukt um een bosschup wat kracht bij te zetten. Ie kunt gloepends bliede wezen, dan bi’j slim bliede.

Slik – wij zegt nou vaak snuup, maor dizze lekkernij het toch echt slik in het Drents.

Dreuge worst – dat woord hef weinig oetleg neudig, nietwaor? Allent dat dit het ienige woord in de liest is dat oet twei woorden bestiet.

Kniepertie(s) – ok dizze sprek veur zuch. Knieperties bint de platte koekies die vaak in dizze tied eten wordt.

Sukelao(gie) – naost dat het woord gloepends lekker klinkt vindt veul lu het ok een lekkernij die aj niet liggen laoten kunt.

Van 13 tot an 18 december kuj stemmen op dizze vief woorden.

Op 20 december wordt dan het lekkerste Drentse woord ’s mörgens bij Radio Drenthe bekendmaakt.

Stemmen