Hier kuj Drents praoten!

Beste cultuurmakers in de previncies Grönning, Drenthe, Fryslân, Overiessel en Gelderland,

Pasleden hef het noordelijk samenwarkingsverband We the North met de previncies Overiessel en Gelderland en het Ministerie van OCW een subsidieregeling opensteld: de Culturele Regeling Proeftuin Meertaligheid. Dizze regeling mak het meugelk subsidie an te vraogen veur provincie-overstijgende culturele preducties waorin meertaligheid een rol hef, en dan met name streektaal-meertaligheid.

De instuurdaotum veur de eerste ’tender’ was 1 meert 2020, die veur de tweede, leste meugelkheid um subsidie an te vraogen is 1 juni 2020.

In febrewari hef der in Grönning een eerste succesvolle netwarkbijienkomst west, die een koppel schiere anvraogen opleverd hef. De kwartiermakers hadden veur um in anloop naor de tweede instuurdaotum vanneis zo’n netwarkbijienkomst te organiseren. Corona gooide roet in het eten.

Um toch vraogen van cultuurmakers te beantwoorden en um ideeën en contacten oet te wisseln, heb ze een ‘webroom’ opend: www.whereby/welkomindeproeftuin . Daor zult de kwartiermakers op vrijdag 17 april tussen 09.00 en 17.00 uur op ofspraak beschikbaar weden veur alle vraogen over de regeling en over jullie prejectplannen. Ze neugt cultuurmakers um veur dunderdag 16 april een ofspraak te maken via: https://proeftuinmeertalingheid.youcanbook.me. Der kunt gesprekken inboekt worden van standaard 15 minuten. Ter veurbereiding op ’t gesprek kuj een e-mail sturen naor proeftuinmeertaligheid@gmail.com .

Veur de subsidieveurweerden, het anvraogformulier, meer informatie en contactmeugelkheden over de ‘Proeftuin Meertaligheid’ kuj kieken op de webstee http://www.wethenorth.org/proeftuinen/meertaligheid/ .

De kwartiermakers Goffe Jensma en Anne Popkema hoopt dat ze je zo tóch helpen kunt um met schiere cultuurprejecten deel te nimmen an de ‘Proeftuin Meertaligheid’. Ze ziet je geern online op vrijdag 17 april!