Op 28 feberwaori 2014 is bai Het Drentse Boek een naaie bundel oetkomen van Anneke Mensen-Siegers oet Paais. ‘Lokroup van een Fladdervlinder’ is een verzaomeling gedichten en praotverzen die veul minsken anspreken zal: tougankelijke gedichten waor bai naoder inzein vaok van alles an te beleven is.

Anneke Mensen had al van jongs of an veul belangstelling veur taol. Taol moet tougankelk wezen, vindt ze, allén dan kuj een breid publiek bereiken. Dat publiek hef ze op verschillende maotschappelijke terreinen vonden. Naost de schrieverij was ze actief as ambtenaor van de burgerlijke stand en laaidde rouwdeinsten, vaok ok in de streektaol. Daorbai kuj, volgens de schriefster, dicht bai de minsken kommen. En heur schrieverij brocht heur in het huile noorden as ze oet heur waark veurlas.Heur gedichten in het Noord-Drents verschienen al jaoren in Maandewark/Oeze Volk, Drents Letterkundig Tiedschrift Roet en in het Grunninger Toal en Taiken. Zij is schriever op de grèens van het Drèents en het Grunnegs, zoas ze zölf zeg.