Annije Maria Brans

Annije Maria Brans is de schoelnaam van Marga Zwiggelaar.

Annije Maria Brans (1963)

Ze gruide op in Hoogeveen en vertrök in 1980 hen Kampen um daor te studeren an de Sociale Academie.
Ze warkte jaorenlang as opbouw- en jongernwarker in Hoogeveen en undertussen studeerde ze Algemiene Cultuurwetenschappen. Ze rondde die studie of in 1999. Van 2001 tot 2011 was ze an het wark in de museumwereld; zo was ze u.a. conservator van het Museum de 5000 morgen.
Annije Maria Brans schref geregeld in cultuur-historische tiedschriften, benaom over Drentse underwarpen. Ze hef een eigen cultureel en historsich adviesbureau had en is ien van de oprichters van de levende geschiedenisgroep Die Luyden van ‘t Hooge Veine.

As Annije Maria Brans publiceerde Marga Zwiggelaar in 2007 veur het eerst heur Drentstaolige gedichten in een boek: Begraafplaatsen in de gemeente Hoogeveen.
In 2010 dee ze met an de schriefwedstried van het Huus van de Taol. Der verschient regelmaotig gedichten van heur in het blad Roet.

Heur poëzie-debuutbundel Niks is zo hiete as old ies kwam oet in 2015 bij Het Drentse Boek. Op 7 december 2019 kwam Marga heur eerste proza-bundel oet. Dat was de historische misdaodroman Maagie in het ies, die zuch ofspeult in het Hoogeveen van 1785. Veur dizze roman kreeg Marga Zwiggelaar de streektaolpries van het Dagblad van het Noorden.

Boekpublicaties:

Een gedicht van Annije Maria Brans:

Starfhuus

Het is stille veur de roeten
Het locht, wat stoems,
blef daor wat staon.

Een blad valt dale:
wachter op de drömpel.

Het fluustert in de bomen,
het zingt in de struken:
rouwgeritsel van de hof.

Een gieteling röp in de geute:
‘Veuruut, veuruut, veuruut!’

En in de eerde gromt en gruit
een iets dat ik niet holden kan.

(oet Niks is zo hiete as old ies)