Erik Harteveld (1955)

Nijlande is een dörpie van umdebij twintig boerderijen tussen Raol en Assen.
Daor hef e Drents leerd. De fijne kinderwereld van Nijlande is ’t belangriekste thema van zien gedichtenbundel Hoss is dood.
Doe Erik op de HBS zat, woond’e in Grol waor veul meer te doen was. Meziek maken en achter de wichter an zitten, is hum het miest bijbleven. De thematiek van zien band Kopstubbers/Erik Harteveld Bluesband komt daor veur ’t grootste diel vort.
Later is Erik verhoesd naor Stad waor e Nederlandse Taol en Letterkunde studeerd hef en daorna Slavische Taolen.

In 1983 kwam e veur het eerst met het Drents as cultuurtaol in anraking as tenielspeuler in ’t stuk An ’t Voetenende van Marga Kool. Vlak daornao hebt ze hum vraogd een bijdrage te levern an Mandielig, het Drents radiopregramma van Radio Noord. Daornao was e niet meer weg te denken oet de Drentse media: Boenders en Bössels op Radio Drenthe en Kwaanskwies, Rikrak, De Berichten, het Kleine Hoessie op de Heide en Erven Takens veur TV Drenthe.
Tiedens zien radioperiode begund’e veur het eerst in het Drents te schrieven. Eerst gedichten en later humoristische stukkies in de kraant, zoas 1000 jaor Drenthe en Vrouw Koetje.
Hij hef ok tenielstukken schreven met de titels Kriet op tiet, Breien veur Burundi en De wraok van Tale Kwant en HIBO-party.

Erik Harteveld woont in Stad.
Vanof 1995 hef e leider west van de bluesband Kopstubbers. Dizze band hef drie cd’s in eigen beheer oetgeven: Altied pech (1998), Zummerfeest (2000) en Not Normal Anymore (2003). Harteveld prebeert de grenzen tussen meziek en gedichten wat vervagen te laoten. Het gedicht Laandschup is daor een veurbeeld van. Hie hef dit schreven as gedicht, maor later as liedtie instuurd naor ’t Noord-Nederlaands Liedtiesfestival 2005. Hie wun de eerste pries. Met aal meugelke zintuuglijke waorneming (geur, kleur, geluud en meer) beschref e het landschap dat niet veraandert.
In december 2005 is Erik Harteveld keuzen tot stadsdichter van Assen.

Hie publiceerde vanof 1989 in Roet. Eerst as Drs. Mannes Kwant met parodistische boekrecensies, later met gedichten en verhalen. Wark van hum stiet in bloemlezings.

Boekpublicaties:

• Hoss is dood (poëzie, Zuudwolde 1995);
• Veur de Ewigheid…Vrouw Koetje vertelt (Zuudwolde 2002);
• De Eeuwig zoemende vliegenstrip (2008, Nederlandse gedichten);
• Zwiers Mechanisatie (2009, Nederlandstaolige dörpsnovelle, samen met Sophie Timmer);
• Diezeg Laand (2010, samen met Jan Glas en Illand Pietersma).

CD’s van de Kopstubbers:

• Altied pech (1998);
• Zummerfeest (2000);
• Not Normal Anymore (2003).

Tenielstukken van Erik Harteveld:

• Kriet op tiet;
• Breien veur Burundi;
• De wraok van Tale Kwant;
• HIBO-party.

Een keur oet het wark van Erik Harteveld:

 

KOPSTUBBERS – ALLES MUT VERAANDERN

Alles mut veraandern
Niks blef zoas het is
Der wordt een nei begun maakt
Met de geschiedenis
Wat under is komt boven
Alles mut op de schop
Niks blef meer hetzölfde
Alles mut op de kop

Want wat nou gebeurt dat deugt niet
Zo hef het gien zin
Vanof nou wordt alles beterder
Dit is pas het begin

En Jezus die leup zunder zinken over het water
Maor ‘t is nou toch al gauw een paor doezend jaor later

En Mozes die zee: “Ie mugt heulemaol niet doden.”
En umdat hij dat zee is het sindsdien verboden

Van Mohammed mugt wij niet het eerdse begeren
Maor zölf leup hij ok in heul sjieke kleren

Alles mut veraandern, alles mut veraandern
Wij niet, maor die aandern
Alles mut veraandern, alles mut veraandern.

 

BURGEMIESTER EN WETHOLDERS

Beste leesders en leesderessen.

Ik laot mij eerstdaogs as Burgemiester kiezen. Dan zult wij de boedel ies even veraandern. Ten goede vanzölfs! Ik heb de griep niet had. Heer Koetje wel. Het leup hum dun deur de boksem. Dat komt aj een wat zwakke geest hebt, is het besluut ok niet stark. Zo ien kan gien Burgemiester worden. Burgemiesters mugt nooit ziek wezen. Feitelijk is een Burgemiester een soortement hoesvrouw! Zij zörgt d’r veur dat alles goed reilt. As ‘t d’r op ankomt is een hoesholding gewoon een stad: met ziekenhoes (verbaandtrommel), restorants (de keuken), universiteit (mien boekenkassie), sportvelden (sjoelbak), Openbaor vervoer (de fiets), plantsoenendienst (heer Koetje). Wegens hierom bin ik zeer geschikt as Burgemiester. Wat ze wel zegt is: regeren is veuroetkieken. Dit klopt percies! As ik zie dat d’r nog maor een klein beetie sukker is in de bus, begunt mien brein drekt te regeren. Ho jonges, niet oetstellen! Drekt even neie kopen veur het te laot is. Want aans zit ie zomaor zunder sukker. Dit kuj misschien nog wel volgen. Maor nou begunt het echte regeren! Want ik gao naor de Spar veur neie sukker. Maor (en nou komt de veuroetziende blik!) dan kieke ik ok drekt even hoeveul koffie d’r nog is! Er is nog ongeveer de helft. Het is een stoere afweging veur de mieste meinschen. Niet veur mij! Ik vul de koffie an tot hij compleet is! Dit scheelt een keer lopen! Een goeie burgemiester hef altied genogt koffie in hoes. Een goeie Burgemiester giet met lege fietstassen hen, en komt met vollen weerom! De fietstassen van een goeie Burgemiester puilt altied oet. Ie kunt de riempies nog maor te nauwe nood dichtgepsen. Aj naor de meeste steden kiekt, hej gewoon weerdeloze Burgemiesters. Dat komt omdat het manlu bint. Die bint gewoon um alles te laoten verslonsen en te versloeren. Overal ligt smerige sokken en underboksems. Zuuk ie naor hansaplast in het ziekenhoes? Schoon op! Burgemiester hef ze niet anvuld! Ok nooit een keer zeggen daj de leste rol twalletpapier oet het geutstienkastie haolt! Tiepies manlu. Ze bint allent geschikt as Wetholder. Die kunt allent wat as ze een bevel kriegt. Maor ie mut ze as Burgemiester niet zölf laoten geworden. Dan komt d’r niks van terecht. Lest ok. Ik zeg tegen de Wetholder: maok ie mij het plantsoen ies an kaant! Komt niks van terecht. De Wetholder stiet maor wat op de schup te loeren. Mien bevel was niet dudelijk genogt. Ik leer er drekt enorm van: Hier even twee steek diep, daor even anharken, blaodern op een bultie, krukaor pakken, keurig afvoeren hen de kompostbult. Dan is het nog maor een kwestie van anvuren of straffen algelang de warklust van de Wetholder. Ik heb een biezunder goeie stijl van leidinggeven, want alles wat ik wil gebeurt! De meinschen wult dudelkheid. Aj ze maor wat laot krummeln wordt ze ongelukkig. Miestal is het zo dat as een Wetholder ongelukkig is, dan hef e te lang ankrummeld. D’r stiet hum gien dudelk bevel veur ogen! As Wetholder kuj nooit gien Burgemiester worden, maor as Burgemiester bin ie ok maor zo Minister of nog hoger. Het is maor een tik an ‘t oor. Ie zit maor zo met Brjezjnjev te vergaodern. Al die hoge pieten bint begund as Burgemiester. Nooit as Wetholder. Wetholders is het domste volk wat of d’r bestiet, maor ie kunt d’r niet zunder! Zo hef alles zien eigen stee in de Pieramiede der Macht! Pas aj een beetie bovenin zit, kuj het gekrummel underin overzien!

Oet: Erik Harteveld – Vrouw Koetje vertelt…