Martin Koster (1950)

Hie hef naor de HBS in Zwolle west en in de jaoren ’70 hef e an de Rieksuniversiteit in Stad de underwiesakte M.O. Nederlands haald. As leraar hef e warkt in Assen, Deventer en Stadsknaol. In het lest van zien underwiesloopbaan was e in Leek warkzaam in het veurtgezet underwies. Martin Koster woont al jaoren in Lievern.

Zien schrieverschap hef in de loop van de jaoren aordig wat opleverd, maor veur alles kuj Martin Koster zien as ‘Mister Roet’. Hie hef in 1979 samen met Ton Kolkman het Drents Letterkundig Tiedschrift Roet opricht en dik twintig jaor hef e der redacteur van west.
Kolkman en Koster vunden in 1979 dat er ‘neudig ies wat daon worden mus an ’t anfietern van de verzoorde Drentse letterkunde die miesttied niet wieder komt as ‘siep, schaop en scheper’. Veurdat Roet opricht weur stuurde Martin Koster wal bijdragen naor Oeze Volk, maor de redactie van dit blad har niet veul op met zien teksten die niet pasten ‘in de kraantiespottencultuur’.

Roet kreeg in 1995 de SNS-cultuurpries van Drenthe veur literatuur.

In 1995 hef Koster bij Het Drentse Boek Zölfportret mit sparzegelties oetkommen laoten. ’t Roetnummer van winter 1999/2000 stun in ’t tieken van Koster zien ofscheid as hoofdreacteur. Zien wark is in dat nummer bundeld met as titel Ave Reest.
In 2004 hef Martin Koster een bloemlezing samensteld oet 25 jaor Roet met as titel Strèupers van de Taol.

Martin Koster komt altied dudelijk veur zien miening oet en zien teksten hebt een satirische inslag, zien gedichten bint wal ies parodieën. Dat hef in Drenthe wal ies veur rebulie zörgd. Zo hef e op Marga Kool heur Achter oen ogen het gedicht Veur mien roeten schreven. Winter op de Paaizermao van Peter van der Velde weur Zommer op de Paaizermao en het gedicht De weg van Spier naor Wiester van Roel Reijntjes weur Tussen pier en liester.
Zien gedichten gaot over de dood, allennig weden, de stoere verholding tussen manlu en vrouwlu en over de mèensen an de raand van de samenleving.

In oktober 2006 hef Stichting Drentse Taol, de veurloper van het Huus van de Taol, een schrieverspetret eur video/DVD van Martin Koster prissenteerd.

Aandere streektaolactiviteiten: twei jaor gastdocent Drents bij de Pabo in Meppel; redacteur van de cursusboeken Noordenvelds en Midden-Drents; met Marga Kool samensteller van radiocursussen Drentse taol en literatuur; corrector en èendredacteur van een koppel Drentse publicaties; körte tied bestuurslid van de Drentse Schrieverskring; stun an de wieg van het tiedschrift Krödde, de Grunningse tegenhanger van Roet; columnist van de Drentse Courant en ’t Dagblad van ’t Noorden.

Hie publiceerde –  as Meine Roswinkel (en nog twintig aander schoelnamen) en van 1995 of under zien eigen naam – gedichten, verhalen, satirische stukkies en parodieën. Zien wark kwam in een koppel bloemlezings terecht.

In meert 2011 hef Martin Koster de Streektaolpries 2010 van Het Dagblad van het Noorden wunnen met de dichtbundel Hotel an ‘t spoor.

In 2020 kreeg Koster een lintie en nou is e Ridder in de Orde van Oranje-Nassau. Koster kreeg het lintie veur zien, zoas burgemeester Klaas Smid zee, ‘niet te underschatten inzet veur de Drentse streektaol’.

 

Boekpublicaties:

• Zölfportret mit sparzegelties (Zuudwolde 1995),het eerste Drentse literaire ego-document;
• Het hondeparadies (een Suske en Wiskealbum, de eerste Drentse stripvertaoling, Grunning 1998);
• Tegen de stroom in, de Nederlandstaolige monografie over het kunstenaarschap van Rudi Seidel (Zuudwolde 1998);
• Ave Reest (het winternummer van Roet 2000), een bloemlezing uut zien wark;
• Strèupers van de Taol, bloemlezing van 25 jaor Roet ( Zuudwolde, 2004);
• Is ‘t vandage of gister (vertaolings van Vasalis + redaksie) (Beilen, Het Drentse Boek 2009);
• Hotel an ‘t spoor (Beilen 2010) dichtbundel;
• Oostwaartsch! (Beilen 2016) novelle. Gedrukt in beperkte oplage in serie Linksum. Boek is as allén as e-book nog verkriegbaar.
• Vaart mien busse (een selectie oet de schrieverij van Martin Koster, Ter Verpoozing).
• Een goed stuk vleis (2020)
• Ik trap hum an (2020)

In het Dagblad van het Noorden hef Martin Koster een jaor of wat geregeld een column schreven veur de rubriek Sjarlefrans. Tegen het èende van 2020 zal der een bundel van dizze columns oetkommen bij Het Drentse Boek.

Een keur oet ’t wark van Martin Koster lezen:

 

ERICA WAOR BISTOE BLEVEN

daor lig ze nog
die lil’ke drèentse heide

wat voel en stroek
en grös en schaop

een ansichtkaorte
van een halve stuver

’t is kuunst
en aans is ’t niks

kuunstmes deraover
en dan de ege!

Uut: Ave Reest (Roet Winter 1999 / 2000)

GAOJ MIT

Gaoj mit
’t aovend gaow vurt
wij pakt de trein en
stapt ienerwaorens uut en
gaot slaopen in een hotel en
eten in een dik restaurant

ik hebbe gien zin an reizen en
slaopen mit oe wil ik niet en
van eten mut ik speien

gaoj mit
’t aovend gaow vurt
wij pakt de trein en
stapt bij een badplaatse uut en
dan gaow lopen langs ’t strand

ik holle niet van reizen en
ok niet van de zee

gaoj mit
’t aovend gaow vurt
wij pakt de trein en
gaot hen de stad en
wij drinkt een glas of wat

ik holle niet meer van oe.

Uut: Ave Reest (Roet Winter 1999 / 2000)