Roel de Lange (1912-1959)

Hie gruide op in Noord- en Zuudbarge in een gezin met maor liefst achttien kinder. Roel de Lange weur beroepsmilitair en kwam in de Tweede Wereldoorlog bij de plietsie. Hie kwam toen ok in het verzet en hie weur in febrewaori 1945 deur de SD arresteerd en naor concentratiekamp Neuengamme stuurd. Daor weur e ter dood veroordield, maor gelukkig kwam het niet tot een executie. Vanoet Lübeck gung e terug naor Nederland. Hie overleefde een Brits bombardement, waorbij drie van de vier evacuatieschepen naor de zeebodem scheuten weurden. Roel de Lange kwam terug met tuberculose en daordeur mus e lang op berre liggen. In die tied begund’e te schrieven. Nao zien ziekbed kwam e bij de rieksplietsie in Zuudlaoren en in Diever.

In 1951 leverde Roel de Lange an de Provinciale Drentse en Asser Courant het verhaal Strijd in de kerstnacht.
In 1956 weur zien novelle Wèrum naor ’t darp bekroond met een pries van het tiedschrift ’t Swieniegeltje. In 1958 weur zien jeugdboek Met de trekvogeltjes op reis (Kluitman) oetbracht.
Hiel bekend weur e met de Verhalen over ’t Zudenveld en heur bewoners, die in 1957 en 1958 in de Emmer Courant verschenen. Ok in het Drents Landbouwblad weur in 1958 een keur oet dizze verhalen plaotst.
Voor de RONO har Roel de Lange een wekelijkse column, met as titel De belevenissen van een Drentse dorpsveldwachter. Vanof 1956 was e een belangrieke metwarker van Oeze Volk. In Diever en wiede umgeving hef e een koppel veurdrachten holden, die altied slim in de smaak veulen.  Ok schreef e met Nell Meyboom-Veltman en Abe Brouwer de revue Liever naar Diever, waormet de VVV Diever in 1959 het 25-jaorig jubileum vierde.

Van het Nedersaksisch Instituut kreeg Roel de Lange het verzuuk um een Drentse roman te schrieven, maor dit wark (Strubben Jans) hef e niet of kregen. Behalve in tiedschriften as ’t Swieniegeltje en Oeze Volk kwam wark van Roel de Lange oet in bloemlezingen as Drente’s erfgoed (1979) en Maandewark (1994).

In september 1959 weur e tiedens een verkeerscontrole anreden. An de gevolgen daorvan is e oet de tied kommen.

Publicaties:

• Wèrum naor ’t darp (novelle, 1956);
• Met de trekvogeltjes op reis (jeugdboek 1958);
• Verhalen over ’t Zudenveld en heur bewoners (1957 en 1958 in de Emmer Courant);
• Liever naar Diever (1959, revue, samen met Nell Meyboom-Veltman en Abe Brouwer).