Gezienus Omvlee (1948-2022)
Kört nao zien geboorte verhoesde het gezin naor Zuudbarge, waor zien pap mulder was. Zo rond het jaor 2000 begunde Gezienus Omvlee te schrieven. Toen schreef e namelijk kwatrijnen en sonnetten veur zien collega’s van het gemientehoes in Emmen. Twee jaor lang schreef e aal twee week een gedicht, die kwamen te staon op Emmen.nu en op gemeentedichteremmen.nl. In 2008 kwam Emmen Dichterbij oet, een oetgave met een keur van zien Nederlands- en Drentstaolige gelegenheidsgedichten oet zien ambtsperiode. In 2006 was e de eerste gemientedichter van Emmen.
In 2009 schreef Gezienus Omvlee samen met Klaas van der Meulen en Willem Koopmans Drenthe, middelpunt der aarde. In hetzölfde jaor vreug Ton Peters hum um zuch an te sluten bij het lightverse-collectief, waor Rob Boudestein en Ben Hoogland ok bij heurden. Met dezölfde drie manlu vörmt e ok het dichtersgezelschap De Loftrompet.
In 2012 kwam van heur de Nederlandstaolige gedichtenbundel De dood en het peloton oet met 44 wielergedichten over wielrenners die op een vrumde manier oet de tied kommen bint.
Samen met de aandere dichters van het Light Verse Collectief steld’e in 2014 de bundel Drenthe is best mooi (op Google Maps) samen, dat oetgeven is deur Het Drentse Boek.
In 2018 prissenteerde het Light Verse Collectief de bundel Binnenkort uitverkocht. (Het Drentse Boe).
In het winternummer 2009-2010 van Roet stun veur het eerst een gedicht van Gezienus Omvlee, namelijk Annonce. Dit gedicht heurde bij een serie van vier, waorvan de aandere drie van de haand van TonPeters, Rob Boudestein en Ben Hoogland waren.
In 2011 schreef Gezienus Omvlee aal week een Drentstaolig gedicht veur de website van het Huus van de Taol. Ok in Zinnig stunden aal maol zien lichtvoetige, taolveerdige gedichten, al dan niet met kwinkslagen.
Omvlee is in 2022 oet de tied kommen, naodat e al een toertie ziek was.
Boekpublicaties:
- Emmen Dichterbij (2008);
- Drenthe, middelpunt der aarde (2009, samen met Klaas van der Meulen en Willem Koopmans;
- De dood en het peloton (2012, samen met Rob Boudestein, Ben Hoogland en Ton Peters);
- Drenthe is best mooi (op Google maps) (2014, samensteld in de maande met Rob Boudestein, Ben Hoogland en Ton Peters);
- Binnenkort uitverkocht (2018, samen met Rob Boudestein, Ben Hoogland en Ton Peters)
Een keur oet het wark van Gezienus Omvlee:
Twee lichte gedichies:
Hij har altied veur eerappels opteerd
Maor ’t loonde allemaol de muite niet
Want hij har jaor nao jaor een deficit
Tot dat e dan zien kaansen had ekeerd
Want nao ‘t besluut om siepels te preberen
Stun e in ’t naojaor op zien laand te reren
en over onze starkste man in ’t dorp:
Het is misschien een stark verhaol
maor de starktste man van allemaol
woont bij ons in het dorp an het kanaol
(handen hard as stien
en spieren stark as staol)
Hij tilt twee mudde erpel met zien handen
daorbij twee mudde op zien nek
en nog twee mudde in twee manden
Lest vuulde zich en nei record verplicht
hij hing ok nog een mudde an zien tanden
En barstten em de klompen van ‘t gewicht