Geert Smit (1910-1985)

Nao de HBS in Coevern warkt’e bij Staatsbosbeheer in Maastricht, Utrecht en Zierikzee. Daornao kwam e weer in Drenthe te laande en tot zien pensioen was e hoofdingenieur bij het Kadaster in Assen. Daor was e actief binnen de hervörmde kerk.

In 1980 schreef Geert Smit de teksten veur Exloo in foto’s, een geschiedenis van zien geboortedörp.
Hie was jaorenlang veurzitter van stichting Oeze Volk en hie schreef veur dit tiedschrift een koppel verhalen en gedichten, vaak vol humor. In 1982 kwam het tot een publicatie van verhalen en gedichten bij oetgeverij Hummelen in Assen: Een glassien vruchten.
Van Geert Smit stiet ok een gedicht in de bloemlezing Mandielig, oetgeven deur Het Drentse Boek in 1983. Hie schreef ok veur het blad Kerk en wereld.

Boekpublicaties:

• Exloo in foto’s (1980, teksten van Geert Smit);
• Een glassien vruchten (1982, verhalen en gedichten).

Een gedicht van Geert Smit:

De weg

Hie lop er wal al doezend jaor

Deur d’Leewal en de Rosselwal

Deur d’heide, ’t erpellaand en ’t kor’n

De moiste streep deur ’t Drentse laand

De weg van Eksel hen Odoorn

 

Elk broekt hum daor zien lev’n lang

Van deup’n tot begraffenis

Bij ’t klokgeluu van d’aole tor’n

De moiste streep deur ’t Drentse laand

De weg van Eksel hen Odoorn

 

Wel nam hum niet unner de voet

Bij ‘t Kerstfeest of bij de Oorgermark

Vanzölf: ik weur der an gebor’n

De moiste streep deur ‘t Drentse laand

De weg van Eksel hen Odoorn

(De veriening Dorpsbelangen Odoorn hef het veurgaonde gedicht op een groot bord langs de weg van Oring hen Exel hen zet, vlakbij het zogenuumde Boerenbos.)