Albert Timmer (1952)

In 1976 kwam zien debuut In afwachting oet, een Nederlandstaolige bundel die in 1978 opvolgd weur deur Één en één is twee, die e samen met Willem Pleijsier schreef. In 1983 kwam bij Het Drentse Boek de bundel Stamppot sniebonen oet. Dizze bundel was wal in het Drents en bevatte verhalen en gedichten. Wieder schreef Timmer in Roet en verscheen wark van hum in bloemlezingen. In 1990 schreef e de tekst veur de koppermaandagprent. In datzölfde jaor kwam het boek Tussen Oderen en Odoorn over zien toenmaolige woonplaots Oring oet; Albert Timmer was hiervan ien van de samenstellers.

Van 1991 tot 1994 har Albert Timmer een column in het Nieuwsblad van het Noorden. Daornao is het stil worden rond de schriever Albert Timmer.

Boekpublicaties:

• In afwachting (1976);
• Één en één is twee (1978);
• Stamppot sniebonen (1983).

Een gedicht van Albert Timmer:

Ribbelties

De grote haanden van mien vao
tillen mij zunder meuite op de pakkiesdraoger
Deur ’t geheister is ien kous
naor beneden gleden.
Dudelijk is een rooie streep zichtbaor
van het kniepende rek.
Mien vinger gledt der overhèen en
ik vuul allemaol ribbelties.
“Net een titssluting vao”
“Ja, mien jong”.

Hij wus alles;
ik wus nog nargens van.