Ganzenbord, de regels en de pionnen

Dit bint de regels van het oerolde spel Ganzenbord in de Zinnig van augustus 2020: vanzölf heb wij sommige dingen anpast an dizze Drentse versie. Kiek maor ies en veul plezeer bij het spel!
Daor hej ok pionnen bij neudig. Print de zes gaansies en knip ze oet. Plak der een pepieren voetie under en klaor bi’j.

6. Brug naor vak 12 -> Steek de Witterbrug in Assen over van vak 6 naor 12. Pas op, val der niet of!
19. Bluesfestival Grolloo -> Beurt overslaon! Je hebt het zo naor de zin op het Bluesfestival daj de tied vergeet!
31. Schaopen op je pad! -> Hier blieven tot der een aandere speuler komp: In tied kuj mooi de kudde van de Dwingelse hei scheren.
42. Bossies -> Je bint heulemaol het pad kwiet in het Asserbos > gao terug naor vak 37.
52. Hunebed -> 3 beurten overslaon, want je zit vast under de dikke stienen en veurdaj zo ofvallen bint, daj der weer oet kunt, bint der wal 3 beurten veurbij!
58. Je bint deur het Ellertsveld lopen. Ellert en Brammert hebt je jammer genog opmarkt en dood knuppeld. Maor der is een nei begun: op vak 1!
63. De Drentse vlag is in zicht! Je hebt wonnen.

En nog even dit:
Wel as teveul ogen gooit en dus veurbij 63 komp, die mot vanof 63 terugtellen. Je kunt dan op 58 of 52 terechtkommen. Kom je bij het terugtellen op een vak met een gaans, dan tel je het aantal ogen daj gooid hebben terug.
Koj op een vak met een klein gaansie, dan mug je hetzölfde aantal ogen wieder tellen.
Wel as bij de eerste wörp een 5 en een 4 gooit, mag geliek deur naor 53!
Wel as bij de eerste wörp een 6 en een 3 gooit, maog deur naor 26. As dizze regel der niet was, dan zulden dizze speulers via de gaanzen geliek deurlopen naor het ende.