Op 1 april is de neiste oflevering van de podcast Praot Drents Met Mij verschenen.
Journalist Annemiek Meijer oet Gies hef normaal zölf de touwgies in haanden as het um interviews giet. Dat ze dat veur dizze podcast niet har, vuulde toch wat onwennig, asof ze de controle kwiet was.
Drents praoten
Van hoes oet kreeg Meijer de streektaol niet actief met, want heur olde lu preuten Nederlaands met de kinder. Toch markte Meijer in heur wark as journalist dat mèensen makkelijker praot as ze het in de streektaol doen mugt. En oeteindelijk zörgde dat er ok veur dat ze zölf op een gegeven moment ok Drents weerum preut.
Verlegen wichie
Meijer was vrogger verlegen, een dèenker en zeker gien haantie de veurste: ‘Wal gek, want nou stap ik wal makkelijk op mèensen of’. Het schrieven zat er wal al vrog in.
Rechtbankverslaggeving
Meijer döt ok rechtbankverslaggeving: ‘Achter de veurdeur gebeurt natuurlijk hiel wat, maor hiel veul wat aj niet weet’. Dit zörgt er ok veur dat ze zuch der bewust van is dat ze toch wal geluk had hef met waor ze weg komt.
Regioverslaggever
Meijer döt verslag van wat er in de gemiente Midden-Drenthe gebeurt. Allewal ze der zölf niet woont, hef ze der een goed netwark, umdat heur olde lu allebei van oorsprong oet de gemiente Midden-Drenthe komt. Mèensen ontholdt heur daordeur ok makkelijker, umdat ze al een link met de gemiente hef.
Drents in de kraant
Veur het Dagblad van het Noorden schref Meijer de rubriek ‘Hier kom ik weg’ en dat döt ze met veul plezier. ‘Ik vin het wal mooi dat er ok streektaol in de kraant stiet. Wij bint ok een kraant van hier’.
Knieperties
Meijer is dol op knieperties, umdat ze heur doet dèenken an heur oma die altied zee: ‘Oh, Annemiek lust der wal soep van’.
Landgoed De Klencke
Landgoed De Klencke bij Hesseln hef bij Meijer een speciale stee in heur hart. Ze hef der veul wandeld, maor in 2019 ok metdaon an het locatietheaterstuk ‘De toorn van Thunaer’ waor ze in een bootie opkwam: ‘Elke aovend wa’k een beetie bang da’k dan veur al dat publiek in het water vallen zul’.
De podcast is te belustern op alle bekende streamingdiensten, zoas Spotify en iTunes. Ok stiet e op de website van RTV Drenthe en op oeze eigen website.