Margaretha Kleine

Margaretha Kleine is in een mooie zummernacht in de vrogge jaoren zeuventig in Nieuwlande geboren.

Drentse singer / songwriter

Margaretha Kleine Drentse artiesten Huus van de Taol

Toen ze acht jaor was, is ze begund met gitaarspeulen. Maor pas veul later gung Margaretha heur eigen liedties schrieven. Heur eerste Drentstaolige nummer dat as singelie oetkwam was D’r is niks. Dizze ballade was zeker op de regionale zenders slim populair en was de anleiding um een hiele cd maken te gaon. Dat zul Drok worden.

Margaretha weur ok vraogd um in het veurprogramma van De Kast op te treden. Daniël Lohues vreug heur veur het veurprogramma bij zien optreden met de Louisiana Blues Club in De Oosterpoort in Stad en later nog een maol in Grol.

Het debuutalbum Drok van dizze Drentse singer / songwriter is opnummen in de studio van Syb van der Ploeg en Nico Outhuijse (SYCO) in Leeuwarden. In ’t begun van 2008 kwam het album oet. Ok landelijk kreeg Drok aandacht. Zowal Radio 1 as 2 neugden Margaretha oet um te kommen optreden in u.a. Met het oog op morgen, Tros Muziekcafé en Cappucino. Veul van dizze radio-optredens dee ze samen met Peter Deiman (percussie/drums) die ok op Drok te heuren is.

In november 2011 gung Margaretha Kleine weer de studio in veur heur tweede Drentstaolige album. Samen met muzikanten Peter Deiman (percussie/drums) en Richard Zoer (bassist) kwam der een puur en akoestisch klinkend album oet, dat de naam Thuus kreeg.

In het veurjaar van 2018 weur de singel De Planeet oetbracht, ok in eigen beheer. Het maken van neie Drentstaolige liedties giet bij Margaretha gewoon aal maor deur.
Zaoterdag 21 september 2019 hef ze de singel Ieje en ik oetbracht. Dizze singel is veurlopig allén op de radio te heuren. Margaretha hef namelijk nog wal in de kop um een daarde cd oet te brengen en dan mot er daor ok nog wat veur over blieven.

Wieder treedt Margaretha Kleine ok nog op met de band Two dollar Tuesday en dat döt ze samen met Sanne Vinke (bas en zang), Marije Hoekstra (drums en zang) en Hanneke Vinke (gitaar en zang).

Discografie:

  • Drok (2008)
  • Thuus (2011)
  • De Planeet (singel, 2018)
  • Ieje en ik (singel, 2019)

Kiek ok op: www.margarethakleine.nl

Er worden cookies gebruikt voor deze content. Accepteer de cookies om de content te bekijken.