Moi,

Mien naam is Kees Veenstra en ik zit sinds febrewaori 2018 in het bestuur van het Huus van de Taol.

Ik bin 64 jaor, trouwd met Janny en geboren, getogen en woonachtig in het mooie Schoonebeek. Wij hebt een zeun en een dochter die beide het huus al uut bint.

Wat wark angiet vernuver ik mij 24 uur in de weke as HR-manager bij Corlido in Emmen. In mien vrije tied bin ik veurzitter van de stichting Schoonebeek in Actie. Wij organiseert veul op ’t dorp en daor he’k het dan ok knap drok met. Verder doe’k nog wat bij SVV’04 en voetbal ik zölf nog bij de Old Stars van FC Emmen, dat is ‘de ofdieling walking football’ veur 60-plussers. Gloepends mooi um te doen.

Thuus, op het wark en bij alles wa’k verder uutstuk praot ik, as het even kan, Drents met meènsen. Ik bin trots op Drenthe in de briedste zin van het woord en ik zet mij graag in um dat te promoten. Mien uutdaging is um nog veul meer meènsen ok zover te kriegen. Daor maak ik mij graag stark veur. Niet allent as bestuurslid, maar ok as vrijwilliger van het Huus van de Taol.