Moi, mien naam is Roel Barkhof en ik bin vanof 1 jannewari 2022 veurzitter van het bestuur van het Huus van de Taol. Ik bin undernimmer, met een eigen bureau veur communicatie en public relations. Mien femiliegeschiedenis in Drenthe giet terug tot zeker umdebij 1700.

Ik bin geboren in Emmen, opgruid in Börger en Veendam en nao mien studie via Coevern weer terugkommen in Emmen. Nao mien eerste baan as journalist in Veendam he’k verscheiden functies had bij allerlei kraanten in de regio. Hiernao kwam ik bij Radio Drenthe, waor ik met Albert Haar en Roelof Pieters TV Drenthe letterlijk ‘op zender’ bracht heb.

In 1998 he’k de overstap maakt naor het undernimmerschap. Ik bin daorin veural een bouwer, een ontwikkelaar van neie dingen en projecten. Taol is veur mij wat limtigs, een onmisbaar underdiel van mien wark. Helder oetstukken waor het over giet, waorum iets zo is, of waw veur ogen hebt. Miestieds veur mij in het Nederlaands, maor het kan ok in het Duuts en zeker ok in het Drèents. Taol möt veur mij functioneel weden, derveur zörgen dat mèensen heur gevuul goed oetdrukken kunt, zuch lekker vuult en heur cultuur zölfbewust prissenteert. En het möt helpen um leegdrempelig te communiceren.