Het Huus van de Taol hef in samenwarking met RTV Drenthe een darde seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult. In dizze oflevering is cultuurmèens Egbert Meyers te gast.

Grol
Meyers is opgruid op een boerenbedrief in Grol. Der woonden aordig wat femilieleden in datzölfde hoes: ‘Ik zul niet weten waor as iederiene bleef as we hen berre gungen’. En ‘iederiene’ dat waren dan zien opa en opoe, zien oom Bart (die vrogger polio had har), zien tante, zien zuster en zien vao en moe.  Meyers was een speuls en dreumerig jonkie, hie zag alle veugels vliegen aj zien vao geleuven mugt

Meziek in zien jeugd
‘Meziek was der altied. Mien vao was as jongste lid bij de oprichting van Crescendo in Grol in 1924. Mien vao en mien moe hadden prachtige zangstemmen en zungen bij het koor in Raol.’
Toen e een jaor of negen was kreeg e van zien opa op zien verjaordag een accordeon. Hie gung  op accordeonles. Maor toen Johan Derksen bij hum in de klas kwam leerd’e  country-, blues- en folkmeziek kennen. Meyers wus niet wat hum overkwam. Oeteindelijk weur de accordeon dan ok inruild veur een gitaar.

Wark
Meyers hef een jaor of  vieftien in de gezondsheidszörg warkt. In 1989 weur e vraogd um streektaolfunctionaris te worden bij stichting Drentse Taol en dat hef e dartien jaor daon.

Optredens
‘Ik heb wal altied meziek maakt, ik trad in het hiele laand op. In 2002 bin’k veur het eerst vraogd um naor Amerika te kommen. Dat was een ongeleufelijk mooie ervaoring. Het was een warm bad waor ik in kwam. Ik zat in Austin (Texas) in het walhalla van de meziek en vuulde mij ‘one of the guys’.
Meziek hef e altied zien as een communicatiemiddel, nooit as verdienmodel. Dat huufde ok niet, want hier har der altied wark naost.

De podcast is nou te belustern op alle bekende streamingplatforms zoas Spotify en iTunes.