Op 25 meert is de veerde oflevering van de neie serie Praot Drents Met Mij online kommen.
Kapper Josh Hassing gruide op as middelste van zeuven kinder in een katholiek gezin op Klazienaveen. Allewal hij het geleuf nog altied belangriek vindt, is e over de kark minder positief: ‘De kerk vin ik bullshit eersteklas’.
Karbidbusschieten
Hassing much vrogger gien karbidbusschieten, want dat was veur zien oldste breur weglegd: ‘Ik heb het nooit muggen doen, dus dan kriej de pest deran’.
‘Je moet gewoon doen wat een ander ok döt’
Op Klazienaveen weur veural verwacht daj deden wat elkenien deed: warken op de Purit, in de törf of op kantoor. Dat Hassing nao een optreden van het Scapinoballet op de legere schoel daanser worden wol, was volgens zien underwiezer unmeugelijk veur een jonkie van Klazienaveen.
Penny de Jager
Toen Hassing op zuchzölf woonde zag e een advertèentie in de kraant van het Penny de Jager ballet. Hie trök de stoute schoenen an en schreef een brief. ‘Twee dagen later belde vrouw Penny zölf op!’. Hassing daanst er uuteindelijk vief jaor, under meer in de shows van Willem Ruis en bij optredens van Vanessa.
‘De westerlingen dèenken en vulen anders as wij Drenten’
In de tied van Penny de Jager kwam Hassing der al rap achter dat wonen in het westen gien optie veur hum was. Hie zag daor veul ellebogenwark en dat is niks veur hum. Hij blef liever in Drenthe.
De liefde
Bij het stappen in Grönningen ontmoette Hassing in The Mac de liefde van zien leven: ‘Ik zag hum staon en ik dacht ‘dat is hum’’. Aansum weur daor aans over dacht en Hassing mus der echt muite veur doen, maor intussen is e al 43 jaor samen met zien man Richard.
Zingen en acteren
Hassing zit niet stil. Naost zien wark as kapper, stund e veurig jaor in ‘De Vlinderprinses’. Dit jaor komp e met ‘De opgejaagden’ in het Atlas Theater, veur volgend jaor lig der een plan veur een speulfilm en veur daornao stiet er al een project te wachten in Valthermond. Ie zulden dèenken dat e wal mu wordt van zoveul drokte, maor dat zöt e aans: ‘Leuke dingen levert energie op’.
De podcast is te belustern op alle bekende streamingdiensten, zoas Spotify en iTunes. Ok stiet e op de website van RTV Drenthe en op oeze eigen website.