Het Huus van de Taol hef in samenwarking met RTV Drenthe een darde seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult. Dizze maol was FC Emmen keeperstrainer Richard Moes te gast.

‘As het slecht giet, dan kriej de baord erof. As het goed giet, dan hangt ze je um de nek.’ FC Emmen keeperstrainer Richard Moes kan niet deur het centrum van Emmen, zunder dat e anspreuken wordt.

Een goeie keeper herkennen
Richard kek bij een keeper naor uutstraling, beleving en lichaamstaol. ‘Veur mij is het hiel snel dudelijk of het een goeie keeper is of niet.’

Noord-Slien
‘Je huuft gien kraant te hebben bij oes, want je weet alles direct.’ Richard is lid van de schutters op Noord-Slien. Dat heurt zo bij de mannen, zeg e. En ze hebt het maor wát gezellig met mekaar!

Ambitie
Richard is verknocht an FC Emmen, maor ‘Ik stao nog steeds open veur Ajax, PSV of Feyenoord, maor het zul mij wal gruwelijk zeer doen.’

Drents praoten
Op kantoor prat Richard Moes Drents, dat hef e altied al daon. Met de speulers is het veural Nederlands, maor hij zeg altied: ‘As ik hier under de taofel kiek en der lig 100 euro en ik zeg dat in het Drents, dan vindt ze hum heur!’.

De podcast is vanof nou te belustern op Spotify, iTunes en aandere bekende streamingdiensten.