Het Huus van de Taol hef in samenwarking met RTV Drenthe een viefde seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult. Dizze maol prat ze met veurmaolig directeur van het Huus van de Taol Jan Germs.
Voetballer
‘Mien grote wèens was um voetballer te worden. Ik heb ok zo waanzinnig veul ballen tegen schuren en garages anschupt.’ Toch gung het al hiel vrog mis, want nog veurdat zien carrière tot blui kommen kun, har e al een kneioperatie achter de rug.
Zaanddrent of veendrent
‘Kiek, mien pap was een veendrent, mie moe een zaanddrent.’ Germs gruide op in Oring en umdat er gien kleuterschoel was, hef e de eerste zes jaor van zien leven deurbracht op het boerenbedrief van zien olde lu. Daor leerd’e het zaanddrents van zien moe, umdat dat de taol was die in de umgeving praot weur. ‘Maor ik vind de veenkoloniaole taol zó verschrikkelijk mooi’.
Huus van de Taol vandaag de dag
Germs hef altied zegd dat het goed was dat er nao hum aandern kwamen die het aans doen gungen. ‘Ik heb niet zoveul met Facebook en dat soort dingen. Podcast har ik waarschijnlijk niet bedacht um dat te gaon doen.’. Germs vindt het dan ok hiel goed dat het neie team dat soort wegen ok inslat.
Drents op de lange termijn
Deurdat er gien universiteit in oeze previncie is, raak we veul jong volk kwiet an aandere previncies en die komt meesttieds niet weerum. Volgens Germs wordt het daorum een stoere zaak um het Drents op de lange termijn in de bienen te holden.
Pensionado
Behalve oppasopa is Germs ok vrijwilliger bij verscheiden organisaties: bij het dörpshoes in Gasselt, de fietsclub in Geeiten, bij Drents Landschap en veur het Drouwenerzaand. Ok mak e videopertretten veur Plaotselijk Belang Gasselt onder de naam ‘Van wel bi’j der iene?’ ‘De mèensen die mij kent weet dat ik niet zo technisch bin, dus de techniek van het goed op internet zetten, dat doe ik niet. Ik doe de interviews.
Maatschappelijke betrökkenheid
Sinds zien pensionering zet Germs hum dus volop in veur zien eigen dörp umdat e Gasselt een geweldig dörp vindt en daor wat veur terugdoen wil. ‘Ze vraogt mij nooit um dingen in mekaar te knutseln, maor as ik veur het dörp wat doen kan, dan doe ik dat geern en ik vin dat het dörp dat ok verdient.’