Streektaolaovend in de bieb van Beilen

Woensdag 28 september organiseert streektaolorganisatie Huus van de Taol en de Bibliotheek Midden-Drenthe een streektaolaovend in de bibliotheek van Beilen. Der is een gevarieerd programma: Jan Germs, Hans Katerberg en Annemiek Drenth zult optreden met gedichten, verhaolen en meziek. De aovend begunt um 19.30 uur.

Kaorten kuj kopen an de balie of in de webshop van het Huus van de Taol en bij de bibliotheek in Beilen. Kaorten kost € 7,50 in de veurverkoop en € 10,- an de zaal.

 

Jan Germs

De verhalen die Jan Germs schref bint veur een diel autobiografisch, al gebroekt Jan Germs zien dikke doem ok geregeld. Hie schref over zien familie, liefhebberijen, de Drentse taol, het underwies en wat hum rak. Over de Drentse taol en het Drents in het underwies hef e in zien tied as streektaolfunctionaris en directeur bij het Huus van de Taol ok publiceerd. Sinds 2020 schref e columns veur het Drentse tiedschrift Zinnig van het Huus van de Taol.

 

Hans Katerberg

As domnee was e an ’t wark in Marknesse, Westervoort, Bedum en zien leste staonplaots was Raol. Daor kun e ok goed oet de voeten met het Drents in karkdiensten en bij oetvaorten. Nou is e met emeritaat en woont e in Börger. Maor nog aaid giet e veur in karkdiensten, as ’t kan in Drents, maor Nederlands kan e ok. Hij is drok met het umzetten van de Psalms in het Drents en schref columns veur het blad Zinnig.

Annemiek Drenth

Al hiel jong kreeg Annemiek belangstelling veur meziek. Zie was nog maor vief jaor toen ze begunde met zingen. Ze hef in verscheiden koren zungen en in 2012 wun ze het eerste Drèents Liedtiesfestival met het liedtie Ik bin zo wies. Ze is daornaost ok spreekster (Drents en Nederlands) op trouwerijen en oetvaorten en is ze streektaolambassadeur van het Huus van de Taol in de gemiente Emmen.