Geertje Enting (1974)

Zie is de dochter van Geert Enting, die in 2006 veul te jong oet de tied kommen is. Van 1993 tot 1995 hef ze metwarkt an het tiedschrift ’t Larfje. In de jaoren niggentig stunden der gedichten van Geertje Enting in Oeze Volk. Verscheiden jaor was het daornao beheurlijk stil rond Geertje Enting, maor nao het oet de tied kommen van heur pap in 2006 pakte ze het schrieven weer op. Heur pap was veur heur altied een belangrieke anjager west en pap Geert hef de liefde veur de streektaol ok op heur overbracht.
Geertje Enting schref verhalen, columns en gedichten. Mangs döt ze dat under de schoelnaam Annechien Vedder (dat was de opoe van heur pap). Zie schref u.a. in het tiedschrift Zinnig. Wark van Geertje Enting is ok opnummen in verzamelbundels.

Het is (nog) niet kommen tot een boekpublicatie.

Gedichten oet het wark van Geertje Enting:

Het gromt op kowlaanddiek

Het gromt op kowlaanddiek.

Zachies kraokt nou mien tree.

De sneei haokt een schier wit kastraandtie an

boegende boomtakkies,

glaozeg gladvroren riggeldraod

en de rest van oetgebluuid gruuin.

Een haart get op de rekken,

stof in tweeiduuster.

Ik luuster,

heur even heulemaol niks

haol aodem en

pruuif de zuuvere

nuvere winter.

Zwalvies

De wind blas dikke lochten

verduusterd en verkleumd

De daogen slinkt

De regen dwingt

 

de leeste zwalvies bint vertrökken

Waarmt zök an de zuudelijke zun

 

Allenig de nusten bewies van heur bestaon

Oet waoter en modder anvlochten

 

Slechts in herinnering heur hoge sjilpen

As bewies dat een waarme zummerdag bestun

 

Nao die lange kaole winter

Weeit ik zeker waor

Tweei zwalvies maokt veurjaor