Egbert Hovenkamp II (1953)
In 2011 weur Aa en Hunze culturele gemiente van Drenthe en daor vreugen ze Egbert Hovenkamp um de gemientedichter van dizze gemiente te worden. As der wat te doen was in Aa en Hunze, much Egbert Hovenkamp met een gedicht de gelegenheid ofsluten. Ok an het èende van het zundagmiddagradioprogramma Podium van RTV Drenthe much e de oetzending in een Drents gedicht becommentariëren. Hovenkamp nuumt zuchzölf daorum een ‘Terplekkepoëet’.
Egbert Hovenkamp schref al hiel lang. Hie komt oet Eext waor e in 1953 geboren is an de Eexterhalte. Zien pap was daor boswachter. Umdat Egbert vernuumd is naor zien opa Egbert, nuumt e zuchzölf ok wal Egbert Hovenkamp II (de tweede).
Nao nogal wat umzwarvings in Noord- en Oost-Nederland is e oeteindelijk in Assen terechtkommen. Schrieven en vertaolen zit hum in ’t bloed.
Toen e in de jaoren ’80 ies wat wark opstuurd hef an de Drentse schriever Gerard Nijenhuis, hef die zien belangstelling wekt veur het schrieven in het Drents, maor hie schref ok nog aal in ’t Nederlaands.
Zien gedichten bint publiceerd in Roet, Oeze Volk, Scheupers van de Taol en Poëzie van de Hunebedden.
Naost de schrieverij is Egbert Hovenkamp drok an de gang met vertaolwark. Hie vertaolt liedteksten van under andern Bob Dylan en in meert 2008 is der een vertaoling van Die Winterreise, een gedichtencyclus van Wilhelm Müller, van hum oet kommen bij Stichting Het Drentse Boek under de titel Kolde Tocht. Het lange gedicht Howl van Allen Ginsberg van de ‘beatgeneration’ hef e in ‘t Drents vertaold as Galp. As Hovenkamp Galp veurdrag, rak ‘t publiek haost in trance deur de staccato-manier van veurdraogen.
Aj zien gedichten leest, kuj direkt zien dat e niet in ien variant van ’t Drents schref. Hie gebroekt in zien Eexters ok wal woorden oet Zuud-Drenthe as hum dat beter oetkomt. Opvallend is ok zien gebroek van de Drentse spelling. Hie wet hoe of e ’t Drents schrieven mot, maor bij bepaolde woorden kös e veur een eigen spelling zoas niks met een x (nix).
Hovenkamp zien gedichten bint sociaal beweugen, herkenbaar en toegankelk.
Behalve haiku-achtige gedichten schref e ok muzikale verzen, die deur heur ritmiek haost op songteksten liekt. Hovenkamp haalt zien inspiratie oet het Drentse landschap en oet de rockmuziek. Hie lat in zien gedichten zien dat Drent-wezen, maatschappijkritiek, neimoods levensgevuul en muzikaliteit akkederen kunt in de Drentse schrieverij.
Boekpublicatie:
Een keur oet het wark van Egbert Hovenkamp ll:
BRAANDBAOR
Mien haanden braandt in de buus
mien kop gluit in het duuster
de weg die ik vun –
de weg waorop ik mijzölf antröf
is begaonbaor, lig open
Allent het locht dat schienen zul
krieg ik niet an de praot –
ik tast nog in het duuster –
ik kom oet het duuster teveurschien
schrik mèensen of
met mien braandende haanden en gluiende kop.
DE WEG
Cuby zung hier zien blues
– de hunebedden wörden opmaakt
– de heidevelden waren
een plattegrond veur de scheper en zien schaopen.
Cuby zung hier zien blues
– de plaggenhutten wörden flats
– de witte wieven
waren een veurtieken van toeristen en lege puuties.
Cuby zung hier zien blues
– ‘t ontgonnen veen wör ontsmet laand
– ‘t gloepen was
een veurbode van sociaole controle.
Cuby zung hier zien blues
– de Hondsrug wör een route
– Klaosje I
was de draoger van bio-industrie.
&
Cuby zung hier zien blues.
PLAOTSBEPAOLING
Wie as e is
dat zöt e an
de wolken
hoog baoven
zien heufd
Wie as e is
dat heurt e an
de wiend
die zien naom
in de bladern fluustert
Wie as e is
dat rök e an
de locht
die hangt
an ‘t plaotiesboek
Wie as e is
dat pruuft e an
de vruchten
die as e et
van de levensboom
Wie as e is
dat is e gewaor
in alles en iederien