Rieks Siebering (1941)
Net as zien pap kwam e in ‘t underwies terecht. Hij hef virtig jaor warkt as leraar in ’t speciaal underwies.
Rieks hef met zien vrouw jaoren in Hollandscheveld woond. Lezen en belangstelling veur literatuur weur hum van jongs of an bijbracht deur zien pap. Rutger Kopland, Cees Buddingh, Hugo Claus en Lucebert waren zien favorieten.
Hie kwam pas in de kunde met de Drentse schrieverij in de jaoren tachtig, as e met zien gezondheid in de knooi kwam en in ‘t ziekenhoes opnummen worden mus. Iene zee tegen hum dat e zien diepste gevulens opschrieven mot in de taol waor of e ok in dreumt. As e dan ok nog de dichtbundel Achter oen ogen van Marga Kool kedo kreg en lezen hef, wet Rieks dat e in zien eigen Zuudwest-Drents schrieven mot.
In 1986 debuteerde Rieks Siebering in Roet. In 1988 is zien eerste bundel In de varte giet de harmonie veurbij verschenen bij Stichting Het Drentse Boek.
In 1989 kreeg e de Reyer Onno van Ettingenpries. In 1992 verscheen de bundel An een bevreuren riviere. Daornao begunde Siebering ok proza te schrieven. In 1996 kwam de novelle Asof het zummer is oet en in 2001 de verhalenbundel Stromen deur leeg laand.
Rieks zette zuch op veul fronten in veur de Drentse taol. Hij dee dat in zien VARA-café, een cultureel-politiek praotpregramma, deur zien bestuursfunctie bij Het Drentse Boek en later het Huus van de Taol en as prissentator/organisator van Taal an Taofel in Veeningen.
Zien gedichten bint miesttieds niet zo makkelk te begriepen. Je moet ze een maol of wat lezen. ’t Bint vrije verzen, de dichter wil op ’t gevuul ‘t goeie woord op de goeie stee zetten. In veul van zien liefdesgedichten hef e een koppel kosmische begrippen neudig, zoas zee, stromen en golven, um de haost mystieke ienwording met de liefste te beschrieven. Zölfdoding en de dood in ‘t algemien bint ok anwezig in Siebering zien poëzie. En daormet benauwdigheid veur allennig weden en gek worden.
Rieks Siebering was in 2001 ok stichter van Multu Culturele Rijkdom die optredens van allochtone en autochtone schrievers verzörgde en van de warkgroep Publicatie Allochtone Landgenoten die as in 2002 een eerste bundel verschienen leut.
Veur zien grote verdiensten veur de Drentse Taol kreeg Rieks in 2008 het eretieken van het Huus van de Taol.
In opdracht van Stichting Drentse Taol weur van Rieks Siebering een schrieverspetret op DVD maakt.
Boekpublicaties:
- In de varte giet de harmonie veurbij (poëzie, Zuudwolde 1988);
- An een bevreuren riviere (poëzie, Zuudwolde 1992);
- Een stuk of wat bibliofiele oetgaven bij De Klenckepers;
- de roman Asof het zummer is (Zuudwolde 1996);
- Stromen deur leeg laand (verhalen, Zuudwolde 2001);
- Verjaag met mij de rikken van mien laand (gedichten, Beilen 2018).
Een keur oet het wark van Rieks Siebering:
OP PAD
toch is morreng nei liefste, zölfs straks al
en daor bin ik nog nooit ewest
ongeschreven verlangens heb ik um der
hen te gaon
ik leve nou, an de greinzen van veurbij
bewegen is verlaoten van verleden tied
het begun van de ruumte naor
oneindigheid
GEBOREN
ik had het al
zo vake an de zee ezegd
seins schrouwend
seins zonder woorden
zachte as muziek
altied
scheuf de zee dan op mij an
gung open
en umsleut mij vaster
onder, boven en opzied
wij waren stiekem samen
speulend rerend
drievend
ikke en de zee
hef hij oe
mien verhaal verteld
of is oen lief
uut hetzölfde water geboren
Oet: In de varte giet de harmonie veurbij