In zien woonplaots Oring is dichter Gezienus Omvlee op 2 november 2022 oet de tied kommen.
Zo rond het jaor 2000 begunde Gezienus Omvlee te schrieven. Toen schreef e namelijk kwatrijnen en sonnetten veur zien collega’s van het gemientehoes in Emmen.
In 2008 kwam Emmen Dichterbij oet, een oetgave met een keur van zien Nederlands- en Drentstaolige gelegenheidsgedichten oet zien ambtsperiode.
In 2009 schreef Gezienus Omvlee samen met Klaas van der Meulen en Willem Koopmans Drenthe, middelpunt der aarde. In hetzölfde jaor vreug Ton Peters hum um zuch an te sluten bij het lightverse-collectief, waor Rob Boudestein en Ben Hoogland ok bij heurden. Met dezölfde drie manlu vörmd’e ok het dichtersgezelschap De Loftrompet.
Ok was e een jaor of wat betrökken bij de organisatie van Taal an Taofel in Slien.
Gezienus stun an de wieg van het Nederlands Kampioenschap Light Verse, dat net oflopen weekend weer holden is en waorbij e digitaal nog wal anwezig weden kun.
Omvlee, in 2006 de eerste gemientedichter van Emmen, was al een toertie ziek. Hie is 74 jaor worden.
Wij wèenst zien femilie en naosten alle starkte bij het verwarken van dit verlies.