Op 18 meert is de darde oflevering van het neie seizoen van Praot Drents Met Mij online kommen.
Literatuurhistoricus Henk Nijkeuter gruide op in Geeiten in de umgeving van exportslachterij Udema. Zien opa en zien pap warkten allebei veur Udema en ok Nijkeuter zölf hef der nog vekaansiewark daon. Ok was e vaak te vinden op en rondum het terrein van de slachterij, al was dat niet zunder risico. Hij völ ienmaol in ien van zinkputten,dat was een soort moeras. Gelukkig wus zien kameraod hum te redden, maor hie stunk een uur in de wind: ‘Mam hef de kleren verbraand’.
Studeren
Studeren was niet gebrukelijk veur een jonkie oet een arbeidersgezin: ‘Mien pap zee: ‘Aj wilt studeren, dat is verder prima, maor dan moej ok maor zörgen daj het geld derveur kriegt’’. En daor zörgde Nijkeuter veur met veul vekaansiewark en baanties, zodat e de lerarenopleiding in Grönningen doen kun. Daor begund’ e met Nederlaands en geschiedenis.
Archiveren
Deur het vak geschiedenis kwam Nijkeuter in contact met de toenmaolig rijksarchivaris De Vey Mestdagh, die hum inspireerde um archivistiek studeren te gaon.
Loopbaon
Nijkeuter begunde zien loopbaon in het underwies, maor hef der daornaost altied studeerd. Later is e ok nog körte tied streektaolfunctionaris west en is e oeteindelijk bij het Drents Archief terechtkommen.
Drentse schrieverij
Nijkeuter was der al rap van overtuugd dat er te weinig inzicht was in de Drentse schrieverij, daorum besleut um in zien vrije tied te warken an een proefschrift over de Drentse literatuur, waorop e in 2001 promoveerd is.
‘Johanetta was mien kompas’
Nijkeuter was roem virtig jaor samen met zien Johanetta, die in 2024 oet de tied kommen is: ‘Ze is nou een jaor vort en het gemis wordt allent maor arger’. In heur leste fase woonde ze in een hospice in Assen: ‘Veur oous was dat hiel belangrijk, want wij kunden daor man en vrouw weden. Ik was gien mantelzörger’.
De podcast is te belustern op alle bekende streamingdiensten, zoas Spotify en iTunes. Ok stiet e op de website van RTV Drenthe en op oeze eigen website.