Het Huus van de Taol hef in samenwarking met RTV Drenthe een veerde seizoen maakt van de Drentstaolige podcast Praot Drents Met Mij. In dizze podcast prat directeur van het Huus van de Taol Renate Snoeijing met bekende en minder bekende Drenten over de rol die de Drentse taol in heur leven speult.
Groot gezin
Evenementenorganisator Richard de Groot is een geboren en getogen Emmenaar. Hie gruide op in een gezin met twee breurs en veer zussen. Veur De Groot zölf was dat hiel normaal: ‘Mien moe was de oldste van vieftien. En mien pa was ien van zeuven.’ Zien oldste zus meuk het pad vrij veur het oetgaon. De Groot zölf was de lolbroek van het gezin en nam altied het veurtouw bij feessies. Dat is nog aal zo.
Femiliebedrief
Nao zien diensttied kwam De Groot in het femiliebedrief. Dat was niet de bedoeling, maor umdat zien va toen net zien eerste hartaanval had har, weur e vraogd um vestigingsleider veur Emmen en Grönning te worden. Dat hef De Groot veer jaor daon en toen zee e: ‘As der gien aandere baan is as dit, dan gao ik weg, want ik vin der gien flikker an!’ Dat had er met van doen dat e totaal niet technisch was en der gien affiniteit met har. Oeteindelijk giet e an de slag as commercieel directeur.
Plietsieagent speulen
Het bedrief weur over de jaoren zo groot, dat De Groot aal meer commercieel managers under hum kreeg: ‘Ik was niks aans as plietsieagentje an het speulen. En dat vun ik niks.’ Hie was zien evenementenbureau toen al begund, dus het was een kleine stap um oet het femiliebedrief te gaon.
Hello Festival
Veur een jaor of wat terug weur ‘Retropop’ veraanderd in ‘Hello Festival’. Daor was een goeie reden veur: ‘Wij hadden hiel veul bandjes die wollen niet op een festival optreden waor de naam ‘retro’ in veurkwam.’
Hobby’s
As e niet an het wark is, dan is De Groot veul bij grote concerten en festivals te vinden. Behalve Nederlaandstaolig mak het hum niet zoveul oet wat veur meziek: ‘Wij gaot nooit naor een piratenfestival.’
Pensioen
De Groot dèenkt dat e niet met pensioen giet: ‘Ik zol niet weten wat ik aans mus doen. ‘ En ok is de kaans dat e verhoest naor een aandere stad niet hiel groot: ‘Ik bin een geboren en getogen Emmenaar.’
Dizze neie oflevering is vanof nou te belustern op Spotify, iTunes en op alle aandere bekende streamingdiensten. Maor ok via Maor ok via https://www.rtvdrenthe.nl/podcasts/praotdrentsmetmij.