Op 11 meert is de tweede oflevering van het neie seizoen van Praot Drents Met Mij online kommen.
Zangeres Yonina Hendriks is geboren en getogen op Emmer-Compas as middelste in een gezin met drei kinder. Der weur in hoes plat praot: ‘Ik knauw wel het mieste van oes drieën, hoe dat is kommen, dat wee’k niet’.
Zingen
‘As ze mie eerder vreugen: ‘wat wi’j later worden?’ dan zee ik zangeres of mamma. Dat is beide lukt’. Heur muzikaliteit hef ze veural van de kaant van opa en oma, die liedties meuken en zungen. De eerste band waor ze in zung was ‘Back Space’. Daor zat ze samen met heur breur, heur zussie en heur toenmaolige zwaoger in .
Sister Sister
Nao ‘Back Space’ gungen de zussen deur as duo. Het eerste optreden was op een talentenjacht op Zwartemeer en dat smeuk naor meer. Intussen staot ze al roem 15 jaor as Sister Sister op het podium. En kunden ze mekaar as kinder soms wal smoren, as duo is der in al die jaoren nog gien onvertogen woord vallen.
Hey Suzie
Sister Sister hef tweimaol metdaon an het Drèents Liedtiesfestival. De lèste maol met het nummer ‘Hey Suzie’ wat eigenlijk een aandere drèei gef an het nummer van Henk Wijngaard met dezölfde titel. In dizze versie blek namelijk dat Suzie een vrouw van lichte zeden is die met elke vrachtwagenchauffeur metgiet. Wijngaard hef tot nou toe nog niet reageerd: ‘Ik ben nog steeds heul beneid wat hij der van vindt’.
Prinses
Hendriks is opgruid met carnaval op Emmer-Compas. Heur va was ooit veurzitter van de carnavalsverieniging, va en moe bint prins en prinses west en dit jaor is ze zölf prinses west. En dat was best drok: ‘Je binnen overal. Je binnen het visitekaortje van de verieniging. Carnaval brengt mèensen samen’. Ze bezöcht dus veul zusterverienigingen, gung langs bij verzörgingshoezen, schoelen en karrenbouwers.
Knieperties bakken
Hendriks hef het ofgelopen jaor zoveul knieperties bakt veur de carnavalsverieniging, dat ze zuch der zölf over verbaost dat ze in de Drèentse doemstok niet veur stroopwafels keuzen hef.
De podcast is te belustern op alle bekende streamingdiensten, zoas Spotify en iTunes. Ok stiet e op de website van RTV Drenthe en op oeze eigen website.